ئیران و توركیا بۆ به‌رهه‌ڤبوونێ ل به‌غدا هاتنه‌ گازیكرن

وه‌زیرێ ژێده‌رێن ئاڤێ یێ عیراقێ راگه‌هاند، به‌ردانا ئاڤا رووبارێ دیجله‌ ل رۆژێن بهێن دێ باشتر بیت، و وان داخوازا به‌رهه‌ڤبوونا وه‌زیرێ وزێ یێ ئیرانێ بۆ پشكداریكرنێ د سێیه‌م كۆنفرانسێ ئاڤا به‌غدا دا كرییه‌.

عه‌ون زیاب وه‌زیرێ ژێده‌رێن ئاڤا عیراقێ راگه‌هاند، دیدار و كاركرن دگه‌ل لایه‌نێن ئیرانى و توركى سه‌باره‌ت پشكا ئاڤا عیراقێ دبه‌رده‌وامن، هه‌روه‌سا وان گازییا وه‌زیرێ وزێ یێ ئیرانێ بۆ پشكداریكرنێ د كۆنفرانسێ سیێیێ یێ به‌غدا دا بۆ ئاڤێ كرییه‌، كو بریاره‌ ل هه‌یڤا بهێت ل عیراقێ ب رێڤه‌بچیت.

زیابى ئاماژه‌ ب هندێ ژى كر، دانوستاندن و لێكتێگه‌هشتن دگه‌ل لایه‌نێن توركیا دسه‌ره‌دانێن ڤێ دووماهییێ یێن سه‌رۆكوه‌زیراندا هه‌بوون، هه‌روه‌سا رێككه‌ڤتن ل سه‌ر هنارتنا شانده‌كێ ته‌كنیكییێ عیراقێ بۆ توركیا ل ڤان نێزیكان هاتییه‌كرن، و هیڤییا وان ئه‌وه‌ ئه‌و سه‌ره‌دانه‌ پشتى جه‌ژنا ره‌مه‌زانێ بهێته‌كرن.

وه‌زیرێ ژێده‌رێن ئاڤا عیراقێ ئاشكراكر، عیراقێ داخواز ژ شانده‌كێ توركیا كرییه‌ ل عیراقێ به‌رهه‌ڤبیت، ب مه‌ره‌ما دانوستاندكرنێ ل سه‌ر چالاككرنا یاداشتنامه‌یا لێكتێگه‌هشتنێ كو پێشتر دناڤبه‌را هه‌ردوو وه‌لاتاندا هاتبوو ئیمزاكرن.

گوت ژى: پێنگاڤێن كردارى بۆ بجهئینانا مه‌رجێن وێ یاداشتنامه‌یێ هه‌نه‌، و به‌ردانا ئاڤا رووبارێ دیجله‌ دێ باشتر لێ هێت، ب تایبه‌تى ئه‌گه‌ر توركیا پابه‌ندى رێككه‌ڤتنێ ببیت.