عیراق بۆ توركیا : ڤیزه‌یێ بۆ مه‌ ئاسان بكه‌ن

به‌رپرسه‌كێ وه‌زاره‌تا ده‌رڤه‌ یا عیراقێ داخواز ژ توركیا كر پێدانا ڤیزه‌یا توركیا ب وه‌لاتییێن عیراقێ ئاسان بكه‌ت.

ل دووڤ راگه‌هاندنه‌كا وه‌زاره‌تا ده‌رڤه‌ یا عیراقێ، هیشام عه‌له‌وى بریكارێ وه‌زاره‌تا ده‌رڤه‌ یا عیراقێ بۆ كاروبارێن ستراتیژییا سیاسى و بریكارێ وه‌زاره‌تا ناڤخۆ یا توركیا به‌حس ل ئاسانكرنا رێكارێن پێدانا ڤیزه‌یێ كر.

ل دووڤ به‌یاننامه‌یێ، بریكارێ وه‌زاره‌تا ده‌رڤه‌ یا عیراقێ دووپاتى ل هندێ كر، حكومه‌تا نوو یا عیراقێ ل سه‌ر خوورتكرنا په‌یوه‌ندییێن خوه‌ دگه‌ل وه‌لاتێن جیران ب تایبه‌تى توركیا یا رژده‌.

هیشام عه‌له‌وى راگه‌هاند، ئه‌و عیراقییێن كو بووینه‌ ئاكنجییێن توركیا، تووشى هنده‌ك ئاریشه‌یان دبن، و ئه‌و داخوازێ ژ توركیا دكه‌ن رێكارێن پێدانا ڤیزه‌ و مۆله‌تا ئاكنجیبوونێ بۆ عیراقییان ئاسانتر لێ بكه‌ن.

هه‌روه‌سا دراگه‌هاندنێدا هاتییه‌، بریكارێ وه‌زاره‌تا ناڤخۆ یا توركیا ئاماژه‌ ب هندێ كرییه‌، سیاسیه‌تا توركیا ئه‌وه‌ كو د گه‌له‌ك بواراندا پشته‌ڤانییا عیراقێ د بكه‌ت، و هاریكارییا وێ د گه‌شه‌پێدانا چاندن و پیشه‌سازى و گه‌شتوگوزارێدا بكه‌ت.