ل سووریێ وه‌لاتى دشێن حه‌ڤتییانه‌ ب تنێ ئێك كیلۆیا پیڤازان بكرن

ل سووریێ پیڤاز چوویه‌ رێزا ئه‌وان خوارنان یێن بهایێن وان بلندبووى و دبازاریدا گه‌له‌ك كێمبووی، وه‌كو گوشت، شیر، په‌نیر، هێك، زه‌یتا زه‌یتۆنان، مۆز و سێڤ كو بهایێن وان ژ گه‌له‌ك به‌رهه‌مێن دى بلندتر لێهاتییه‌.

وه‌زاره‌تا بازرگانییا سووریێ دبه‌یاننامه‌یه‌كێدا راگه‌هاند، هه‌موو وه‌لاتى دشێن رۆژێن شه‌مبى ئێك كیلۆیا پیڤازان بكرن، ئانكو ل حه‌ڤتییێ ب تنێ ئێك رۆژ پیڤازان ب رێكا كارتا ئه‌لیكترۆنى بكرن و دبێژیت: دگه‌ل هاتنا هه‌یڤا ره‌مه‌زانێ دێ ژماره‌كا كه‌لۆپه‌لێن دیژى پێشكێش كه‌ن.

دنوكه‌دا بهایێ ئێك كیلۆیا پیڤازان ل سووریێ 15 هزار لیره‌ ده‌ربازكرینه‌ كو دبیته‌ دوو دۆلارێن ئه‌مریكى، هه‌ڤده‌م سوورییان چ جاران هزرنه‌دكر بهایێ پیڤازان بگه‌هیته‌ ڤى ئاستى، ژبه‌ركو ل سووریا پیڤاز ب خوارنا هه‌ژاران دهێته‌ هژمارتن، لێ نوكه‌ پیڤاز هه‌تا راده‌یه‌كێ مه‌زن دبازاریدا نه‌مایه‌ و حكومه‌تێ ئیحتیكار د هاورده‌ و فرۆتنێدا كرییه‌ و پیڤاز ژى چوویه‌ رێزا نان و سۆته‌مه‌نى و غازا ناڤخۆ.