جڤاتا وەزاری یا ئاسایشا نیشتیمانی یا عیراقێ کۆمبوو، ل گۆرەی ڕاگەهاندنا کۆمبوونێ، جڤاتا ئاسایشا نیشتیمانی بۆ چارەسەرکرنا ئاریشەیێن کێم بەردانا ئاڤێ ژ لایێ تورکیا ڤە و کارتێکرنێن وێ ل سەر کەرتێ کشتوکاڵی یێ عیراقێ، دێ گوتوبێژان دگەل وەلاتێ تورکیا کەت.
ئیڤارییا چارشەمبی 22 شوباتا 2023، محەمەد شیاع سوودانی، سەرۆکوەزیرێن عیراقێ و فەرماندێ گشتی یێ هێزێن چەکدارسەرپەرشتییا کۆمبوونا جڤاتا وەزاری یا ئاسایشا نیشتیمانی یا عیراقێ کر.
ل گۆرەی ڕاگەهاندنەکا نڤیسیننگەها ڕاگەهاندنا سەرۆکوەزیرێن عیراقێ، د کۆمبوونەکێ دا، گوتوبێژ ل دوور بهێزکرن و پێشڤەبرنا پەیوەندییێن عیراقێ دگەل هەڤپەیمانان هاتنە کرن. د ڕاگەهاندنێ دا هاتیە،”د کۆمبوونێ دا ئەو ئاستەنگێن بەرهەنگاری کەرتێ کشتوکاڵی و ژینگەها عیراقێ بووین ژ ئەگەرێ کێم بەردانا ئاڤێ ژ لایێ تورکیا ڤە هاتنە گوتوبێژکرن.”
ل گۆرەی ڕاگەهاندنێ، جڤاتا وەزاری یا ئاسایشا نیشتیمانی ب پێدڤی زانییە دەربارەی وێ پرسێ گوتوبێژان دگەل تورکیا بکەن. د ڕاگەهاندنێ دا دیارکریە ژی، جڤاتا وه‌زاری یا ئاسایشا نیشتمانی یا عیراقێ دانوستاندن ل سەر “پڕۆژه‌یێ پێدانا مۆلەتا هاتنەژوور یا ئه‌لکترۆنی” کریە و دوپاتی ل سەر لەزکرن د ڕێکارێن زوو تمامبوونا کارێن وی پرۆژەی دا کریە.
