سامان سیوەیلی، پەیڤدارێ وەزارەتا پەروەردێ یا حكومەتا هەرێمێ راگەهاند، ل سەر فەرمانا سەرۆكێ حكومەتێ ب كۆژمێ ئێك ملیار و 600 ملیۆن دیناران پێدڤییێن خواندنێ بۆ باژێرێ كەركووكێ هاتینە دابینكرن.
گۆت ژی: سالانە هەموو پرۆگرامێن خواندنێ ژلایێ كۆگەهێن پەرتووكان یێن وەزارەتا مە ڤە دگەهنە باژێرێ كەركووكێ و پاشان ب سەر ناڤەندێن خواندنێ دا دهێنە دابەشكرن.
پەیڤدارێ وەزارەتا پەروەردێ ب چەندێن خالان بەحس ل پێنگاڤێن حكومەتێ و وەزارەتا پەروەردێ ژبۆ خواندنا كوردی ل باژێرێ كەركووكێ و دەڤەرێن كوردستانی یێن دەرڤەی ئیدارا هەرێمێ كر، ژوان:
– دابینكرنا پێدڤییاتی و تێچوویێن چالاكییێن وەرزشی و هۆنەری یێن سالانە و مەشق و راهێنانێن پەروەردەیی یێن خواندنا كوردی ل كەركووكێ.
– دامەزراندنا ( 900 ) مامۆستایێن وانەبێژ ب پسپۆریێن جوداجودا و دابینكرنا كرێیا وان یا هەیڤانە.
– دامەزراندن و زێدەكرنا 36 سەرپەرشتیارێن پەروەردەیی.
– ژ سەرجەمێ وان 20 ملیار دینارێن كو سەرۆكێ حكومەتێ بۆ كرینا پێدڤییێن ناڤەندێن خواندنێ ل هەرێما كوردستانێ تەرخانكرین، ئێك ملیار و 600 ملیۆن دینار ب بەر خواندنا كەركووكێ كەفتینە.
