ئەڤرۆ ئێکشەمبی، مەسرور بارزانی سەرۆکێ حکومەتا هەرێما کوردستانێ پێشوازی ل جەنەرال ئەندرۆ گارنەر جێگرێ فەرماندێ گشتی یێ هێزێن هه‌ڤپەیمانان ل عێراق و سووریێ کر.
د وێ دیدارێ دا دووماهی گوهۆرین و پێشهاتێن عێراقێ و ڤێ ده‌ڤه‌رێ و به‌رهنگاربوونا هێرشێن تیرۆریستێن داعشێ و گرنگییا پاراستنا سەروەری و ئاسایش و سەقامگیرییا عێراقێ و هەرێما کوردستانێ هاتنه به‌حس كرن.
جێگرێ فەرماندێ گشتی یێ هێزێن هه‌ڤپەیمانان ل عێراقێ و سووریێ کورتییه‌ک دەربارەیی ئەرک و چالاکی یێن هێزێن هه‌ڤپەیمانان ل عێراق و سووریێ دیار كر، پابەندبوونا هه‌ڤپەیمانییا نێڤدەولەتی ژی ب بەرەدامییا پشتگیريکرنا هەرێما کوردستانێ دووپات کر.
سەرۆکی حکومەتێ تیشک خستە سەر داوی گاڤ و بەرەف پێشچوونێن پرۆسا چاکسازییێ و یەکخستنا هێزێن پێشمەرگەیی د كڤانێ وەزارەتا پێشمەرگەیی دا و دوپاتی ل پێدڤییا سەرخستنا وێ پرۆسێ وەک پشكه‌كا گرنگ یا کارناما کابینا نه‌هێ یا حکومەتا هەرێما کوردستانێ کر.
تەوەره‌كێ دیتر یێ وێ کۆمبوونێ یێ تایبەت بوو ب پێدڤییا چارەسەرکرنا کێشێن دناڤبه‌را هەرێما کوردستانێ و حکومەتا فیدراڵی ل سەر بنەمایێ دەستووری و گرنگیدان ب هەماهەنگییا ئەمنی و سەربازی دناڤبه‌را هێزێن پێشمەرگەیی و سوپایێ عێراقێ، ب تایبەتی ل ده‌ڤه‌رێن کوردستانی یێن دەرڤه‌یی هەرێما کوردستانێ.
