مەسرور بارزانی، سەرۆکێ حکومەتا ھەرێما کوردستانێ، ئەڤرۆ ب هەلکەفتا رۆژا بەرهنگاربوون و نەھێلانا توندوتیژییا ل دژی ژنان ، پەیامەک بەلاڤکر، ئەڤە دەقێ وێیە:
ل رۆژا جیهانی یا نەهێلانا توندوتیژییا ل دژی ژنان و دەستپێکرنا ھەوا 16 ڕۆژان بۆ بەرهنگاربوونا توندوتیژییا ل دژی ژنان، ھەلویستێ نەگوهۆرێ حکومەتا ھەرێما کوردستانێ د بەرهنگاربوون و نەھێلانا ھەر جۆرە توندوتیژییەکێ دا، ب تایبەتی جۆداهی و توندوتیژی ل دژی ژنان دوپات دکەین.
ئێک ژ ئەرکێن پێشینە یێن کابینا نەهێ یا حکومەتا ھەرێما کوردستانێ، خۆشکرنا زەمینێ بوویە ل هەمبەر ژنێن کوردستانێ بۆ هندێ رۆلێ کارا و کاریگەر و ژ هەژی خۆ د پێگەهێن جۆدا یێن حوکومڕانییا ھەرێما کوردستانێدا بگێرن.
ھەروەسا ب ھەموو شێوان بزاڤا پێشخستنا کولتۆرێ ڕێزگرتنێ ل مافێن مرۆڤی ب گشتی و مافێن ژنان و نەھێلانا جۆداهییا ڕەگەزی ل کوردستانێ ددەین .
ژنان ل کوردستانێ ل سالێن بوری دا دەسکەفتێن گرنگ ب دەستڤە ئیناینە، بەلێ مخابنی ھێشتا ئاستەنگ و بەربەست ھەنە و رووبروو توندوتیژییێ دبن، لەوما ھیڤیدارین ب ھاریکارییا ھەموو لایەنان و پێکھاتێن جڤاکی، دووماهییێ ب ھەموو جۆرە توندوتیژییەکێ و جۆداهی یێن ڕەگەزی بینن و ھەرێما کوردستانێ ببیتە نموونەکا گەشا پاراستنا مافێن ژنان و مافێن مرۆڤی ب گشتی
