سەرۆکێ هەرێما کوردستانێ راگەهاند، بریتانیا ل شەرێ دژی تیرۆرستێن داعش هاریکاری و پشتەڤانی پێشکێشی عیراق و هەرێما کوردستانێ کرینە و دوپاتی ژی ل ” پێدڤیا” بەردەوامبوونا هاریکاریا وی وەلاتی د” بەرهەنگاربوونا تیرۆرێ” دا بۆ عیراق و هەرێما کوردستانێ کریە.
ئەڤرۆ چوار شەمبی 07-09-2022، نێچيرڤان بارزانى، سه‌رۆكێ هه‌رێما كوردستانێ پێشوازى له مارشال سامى سامپسۆن، شیرەتکارێ بلند یێ لەشکەری یێ بریتانیا بۆ رۆژهەلاتا ناڤەراست و باکوورێ ئەفرقیا و شاندێ دگەل دا کر.
ل گوێرەی راگەهاندنەکا سەرۆکایەتیا هەرێما کوردستانێ کو دەربارەی ناڤەرۆکا کۆمبوونێ بەلاڤکریە، پەیوەندییێن بریتانیا دگەل عیراق و هەرێما کوردستانێ و دوماهی پێشهاتێن رەوشا سیاسی یا عیراقێ،”مەترسیێن تیرۆرێ” و ” لڤینێن داعش” هەر وەسا پرۆسا چاکسازیێ ل وەزارەتا پێشمەرگەی و پەیوەندیێن دناڤبەرا هەولێر و بەغدا گوتوبێژکرن.
د کۆمبوونێ دا كو شۆڕش ئیسماعیل، وه‌زيرێ پێشمه‌رگه‌ى یێ حكومه‌تا هه‌رێما كوردستانێ ئامادە بوو، نێچیرڤان بارزانی سوپاسیا بریتانیای کر کو رۆڵ هەبویە د پێشکێشکرنا هاریکاریێ بۆ بەرهەنگاربوونا داعش دا و دوپاتی ل پێدڤیا هاریکارییێن وی وەلاتی و جڤاکا نیڤدەولەتی دا کر بۆ نەهێلانا مەترسیێن تیرۆرێ و سەرئێخستنا پرۆسا چاکسازیێ و رێکخستنا هێزێن پێشمەرگەی.
