كۆمپانییێن نه‌فتێ داخوازێ ژ ئه‌مریكا دكه‌ن ناڤبه‌رگێرییێ دناڤبه‌را به‌غدا و هه‌ولێرێ دا بكه‌ت

ئه‌و كۆمپانییێن نه‌فتێ یێن ل هه‌رێما كوردستانێ كاردكه‌ن، داخواز ژ ئه‌مریكا كر هاریكارییا وان بۆ چاره‌سه‌ركرنا ناكوكییێن نه‌فت و گاز هه‌رێما كوردستانێ دناڤبه‌را حكومه‌تا عیراقێ و هه‌رێما كوردستانێ دا بكه‌ت.

ئه‌ڤرۆ ئێكى ئه‌یلولێ، ئاژانسا رۆیته‌رز به‌لاڤكر، چه‌ند نامه‌یه‌كێن وان كۆمپانییان بده‌ست وێ كه‌ڤتینه‌ كو داخواز ژ حكومه‌تا ئه‌مریكا كرییه‌ دگه‌ل وان یا هاریكاربیت، داكو هنارتنا نه‌فتا هه‌رێما كوردستانێ بۆ توركیا یا به‌رده‌وام بیت و ئه‌نقه‌ره‌ نه‌چار نه‌بیت نه‌فتا زێده‌تر ژ ئیران و رووسیا وه‌ربگریت، و ئه‌گه‌ر هه‌رێما كوردستانێ داهاتێ خوه‌ یێ نه‌فتێ ژ ده‌ست بده‌ت دێ مه‌ترسى ل سه‌ر ژناڤچوونا داهاتى په‌یدابیت.

رۆیته‌رزێ ئه‌وژى ئاشكراكر، ئه‌وان كۆمپانییان پشته‌ڤانییا نامه‌یا مه‌ها بوورى یا ژماره‌كا ئه‌ندامێن كۆنگرێسێ ئه‌مریكا كرییه‌، كو بۆ وه‌زیرێ ده‌رڤه‌ ئه‌نتۆنى بلینكن هنارتییه‌ و تێدا دیاركرییه‌، كو پێدڤییه‌ واشنتۆنێ رۆل دچاره‌سه‌ركرنا كێشه‌یێن دناڤبه‌را هه‌رێما كوردستان و حكومه‌تا عیراقێ دا ب تایبه‌ت بابه‌تێ نه‌فت و گازا هه‌رێما كوردستانێ هه‌بیت.

هه‌روه‌سا ئه‌ندامێن كۆنگرێسێ ئه‌مریكا داخواز ژ بلینكنى كرییه‌، بزاڤان بكه‌ت هه‌ولێر و به‌غدا ل سه‌ر ئاستێ بلند بۆ چاره‌سه‌ركرنا كێشه‌یان كۆمببن، و عیراقێ لژێر فشارێن ئیرانێ بده‌رێخیت.

دهێته‌ زانین ل مه‌ها شوباتا بوورى په‌یوه‌ندییێن هه‌ولێر و به‌غدا ل سه‌ر بابه‌تێ نه‌فتێ جاره‌كا دى خراب بوون، پشتى دادگه‌ها فیدارل راگه‌هاندى كو قانوونا نه‌فت و گازا هه‌رێما كوردستانێ نه‌ یا ‌ده‌ستوورییه‌، و پشتى وێ حكومه‌تا عیراقێ چه‌ندین بزاڤ بۆ كۆنترۆلكرنا داهاتێ نه‌فتا كوردستانێ كربوون.