نه‌یمار ل ژێر گه‌فێن زیندانكرنێ یه‌

یاریكه‌رێ هه‌لبژارتییێ به‌رازیل و یانه‌یا پاریس سانجێرمان یا فره‌نسى نه‌یمار داسێلڤا ژبه‌ر په‌یوه‌ندیكرنێ ب یانه‌یا به‌رشه‌لۆنا یا ئسپانی كه‌ڤتییه‌ ژێر گه‌فێن زیندانكرنێ.

رۆژنامه‌یا ئالباییس یا ئسپانی دیاركر، ل سالا 2013ێ ده‌مێ نه‌یمار ل سانتیۆس هه‌ڤبه‌ست دگه‌ل كۆمپانییه‌كا به‌رازیلى یا تایبه‌ت ب كاروبارێن فوتبۆلێ گرێدابوو، كو وێ كۆمپانییێ سه‌رپه‌رشتییا هه‌موو هه‌ڤبه‌ست و كارێن وى یێن بازرگانى دكر، و ده‌مێ یاریكه‌رى په‌یوه‌ندى ب به‌رشه‌لۆنا كرى وه‌كو پێدڤى مافێ وێ كۆمپانییێ نه‌دابوویێ و سه‌رپێچییا قانوونا ڤه‌گوهاستنێ كربوو، له‌وما وێ كۆمپانییێ سكالایه‌ك ل سه‌ر تۆماركربوو، و ژ 17 هه‌تا 31ى چریا ئێكێ دێ ل باژێرێ به‌رشه‌لۆنا دادگه‌ها وى هێته‌كرن، و دگه‌ل نه‌یمارى دادگه‌ها بابێ وى‌ و هه‌ردوو سه‌رۆكێن به‌رێ یێن یانه‌یا كه‌ته‌لۆنى ساندرۆ رۆسێل و جۆسێپ ماریا بارتومیو و به‌رپرسه‌كێ به‌رێ یێ یانه‌یا سانتۆس دێ هێته‌كرن.

زێده‌تر رۆژنامه‌یا ناڤبرى ئاشكراكر، داواكارێ گشتى داخوازا زیندانكرا نه‌یمارى بۆ ماوێ دوو سالان و جزادان ب 10 ملیۆن یورۆیان و جزادانا یانه‌یا به‌رشه‌لۆنا ب هه‌شت ملیۆن و 400 هزار یورۆیان دكه‌ت، لێ كۆمپانییا به‌رازیلى وه‌سا دبینیت كو فێل لێ هاتییه‌ كرن و دخوازیت نه‌یمار بۆ ماوێ پێنج سالان بهێته‌ زیندانكرن و دوى ماوه‌ى دا ژ یاریكرنێ ژى بهێته‌ بێ به‌هركرن.