ئه‌مریكا پێشوازییێ ل ڤه‌گه‌راندنا هێزێن پشته‌ڤانییێ بۆ سه‌ر وه‌زاره‌تا پێشمه‌رگه‌ى دكه‌ت

بریكارێ وه‌زاره‌تا پێشمه‌رگه‌یى و شیره‌تكارێ بلند یێ كاروبارێن ئۆفیسا هاریكارییا ئه‌منى ل كونسۆلخانا گشتى یا ئه‌مریكا كۆمبوون.

وه‌زاره‌تا پێشمه‌رگه‌یى یا حكومه‌تا هه‌رێما كوردستانێ راگه‌هاندنه‌ك به‌لاڤكر و تێدا دیاركرییه‌، سه‌ربه‌ست له‌زگین، بریكارێ وه‌زاره‌تا پێشمه‌رگه‌‌یی پێشوازى ل كۆلۆنێل دۆگلاس، شیره‌تكارێ بلند یێ كاروبارێن ئۆفیسا هاریكارییا ئه‌منى یا كونسۆلخانا گشتى یا ئه‌مریكا ل هه‌رێما كوردستانێ و شاندێ ل گه‌ل دا كر.

وه‌زاره‌تا پێشمه‌رگه‌یى راگه‌هاند، د كۆمبوونێ دا به‌حس ل بریارا خانه‌نشینكرنا هژماره‌كا ئه‌فسه‌ران ل گوره‌یى یاسایێن خانه‌نشینییا وه‌زاره‌تا پێشمه‌رگه‌ى هاته‌ كرن ب تایبه‌ت بۆ نووكرنا شیانێن سه‌ربازى.

د راگه‌هاندنێ دا هاتییه‌ ژى، ڤه‌گه‌راندنا هێزێن پشته‌ڤانی 2 ب بریارا جڤاتا وه‌زیران بۆ سه‌ر وه‌زاره‌تا پێشمه‌رگهی‌ى ب كاره‌كێ ئه‌رێنى و باش هاته‌ پێناسه‌ كرن، شاندێ مێهڤان هیڤى خواستن ئه‌و پرۆسه‌ یا به‌رده‌وام بیت و هه‌موو یه‌كێن سه‌ربازى كۆ ژده‌رڤه‌یى وه‌زاره‌تا پێشمه‌رگه‌یى نه‌، د چارچۆڤێ وه‌زاره‌تێ دا بهێنه‌ رێكخستن.

بریكارێ وه‌زاره‌تا پێشمه‌رگه‌یى بۆ شاندێ مێهڤان راگه‌هاند، ئه‌و بۆ ب هێزكرنا فه‌رمانده‌یى و كۆنترۆلكرنێ دناڤا هێزێن پێشمه‌رگه‌یى دا، مژوولى میكانیزمه‌كا نوو نه‌.