ئەردۆغان بۆ گەریلایێن پەکەکێ: ئەڤرۆ رۆژا دایکانە و چاڤێ وان ل رێکا ھەوەیە

سەرۆککۆمارێ تورکیا داخواز ژ گەریلایێن پارتییا کارکەرێن کوردستانێ پەکەکێ کر کو ب ھەلکەفتا رۆژا دایکان کو دکەڤیتە ئەڤرۆ رۆژا ٩ی گولانێ چەکێ خوە دانن و سۆز دان کو حکومەت دێ ھاریکار بیت ژیانەکا نوو بۆ وان دابین بکەت.
د چارچووڤێ کۆمبوونەکێ دا د گەل دایکێن ئامەدێ د خوارنا فتارێ دا، رەجەب تەیب ئەردۆغان، سەرۆککۆمارێ تورکیا گۆتارەکێ پێشکێش کر، دایکێن ئامەدێ بۆ وان ژنان دھێتە گۆتن یێن د مانگرتنا بەردەوام دا و دخوازن کور و کچێن وان رێزێن پەکەکێ ب جھـ بھێلن و خوە رادەستی حکومەتا تورکیا بکەن.
ئەردۆغانی د گۆتارا خوەدا بەحس ل گەریلایێن پەکەکێ کر و گۆت: ئەو گەنجێن نھا ل ناڤا رێزێن پەکەکێ گوھـ ل وان ھەیە و د شەڤەکا وەکو نھا دا گازی وان دکەت، ئەڤرۆ رۆژا دایکانە و دایکێن خوە دلتەنگ نەکەن و دلێن دایکان نەئێشینن.
ئەردۆغان گۆت ژی: ھەرگەنجەکێ خوە ژ وێ تەنگاڤیێ رزگار بکەت، دەولەتا تورکیا ژ روویێ قانوونێ ڤە دێ وی پارێزیت و دێ پشتەڤانیێ لێکەت ژیانەکا نوو دروست بکەت.