مقدم سیامەدین عەلی، بەرپرسێ راگەهاندنا رەوشەنبیری و پاراستنا ژینگەهێ بۆ خانی نیوز گۆت: پێشمەرگەیێن پاراستنا ژینگەهێ شییان کەسەکێ ب تۆمەتا داربڕینێ دەستەسەربکەن، تۆمه‌تباری دارێن ته‌ڕ یێن ئاقارێ هه‌رسێ گوندێن صوریا، گابێرکێ و بێنارینکێ بڕینه و زیانێن مەزن ب ژینگەها ئاقارێن وان گوندان گه‌هاندینه، ل دەمێ تۆمەتبار هاتییە دەستەسەرکرن دەست ب سەر کەلوپەلێن وی یێن داربڕینێ و تڕومبێلا وی ژی ب بارڤە هاتە گرتن و پشتی پشکنین بۆ بارێ دناڤا ترومبێلێ دا هاتییە کرن دیاربوو ڤی تۆمەتباری دارێن هشک ل سەر دارێن ته‌ڕ دانابوون بۆ ڤه‌شارتنا وان.
بەرپرسێ راگەهاندنێ دیار ژی كر، ژ به‌ركو ئه‌و تۆمەتبارێ هاتییە دەستەسەرکرن داربڕین بخۆ کریە پیشەکێ بەردەوام، ل گۆرەی ڕێنمایێن ژینگەهێ دێ سەرەدەری دگەل دا هێتە کرن و بۆ دادگەهێ هێت ڕاوانەکرن داكو بگەهیتە سزایێ خوه.
سیامەند عەلی ئاماژە کر، بڕینا داران یا دبیتە دیاردەکا بازرگانیکرنێ، پترییا وان کەسێن دهێنە دەستەسەرکرن مەبەستا وان بازرگانیکرنە یان ژی کاسبکارن و کارێ وان یێ گرێدای دار سۆتنێ یە، ل ڤێ دوماهیێ دیاردەکا دی د زێدبونێ دایە كو هندەک کەس فێربوینە پێش دەم دارێن تەر دبڕن و د جهێ وان دا دهێلن تا کو دار هشک دبن و بۆ بازرگانیێ بکار دئینن.
هه‌روه‌سا ل دەمێ دەستەسەرکرنا هەر تاوانبارەکێ، تیمێن وان بزاڤان دكه‌ن ب رێكا دانوستاندنێ تێگەهەکێ رەوشەنبیری یێ پاراستنا ژینگەهێ ل دەڤ وان کەسان بهێتە ئاڤابكه‌ن، و داخاز ژ هەر کەسەکێ کارێ دار بڕیێ دکەت دکەین ، دەست ژ ڤی کارێ نە شارساتنی بەردەن ژبه‌ركو دبیتە كاره‌كێ تیرورێ ل سەر ژینگەها هەرێمێ و تەکەز دکەین کو هەر کەسەکێ ل سەر ڤێ تاوانێ بهێتە دەستە سەرکرن ، لێخوشبون ژبۆ نینە و دێ هێتە سزا دان.
