وەزارەتا دەرڤه‌ یا ئیراقێ یاداشته‌كا نه‌رازیبوونێ دایه‌ بالیۆزخانا تورکیا

وەزارەتا دەرڤه‌ یا ئێراقێ رێكخه‌رێ کاروبارێن بالیۆزخانا تورکیا ل به‌غدا گازیكرییه‌ و یاداشته‌كا نەرازیبوونێ دایه‌ ده‌ست.

نزار خەیروللا، بریکارێ وەزارەتا دەرڤه‌ یا ئێراقێ رێكخه‌رێ کاروبارێن بالیۆزخانا تورکیا ل بەغدا گازیكرییه‌ و یاداشته‌كا نەرازیبوونێ یا حکومەتا ئێراقێ دایه‌ ده‌ست، تێدا ب تووندی نیگەرانییا خوه‌ بۆ سەره‌دانا خولوسی ئاکار، وەزیرێ بەرگرییا تورکیا بۆ ناڤا ئاخا هەرێما کوردستانێ دیار كرییه‌. 

ئه‌و ژى گۆتییه‌ وەزیرێ بەرگرییا تورکیا بێى هه‌ماهەنگی یان رەزامەندییا پێشوەخت یا دەستهه‌لاتا پەیوەندیدار هاتییە دناڤا ئاخا هەرێما کوردستانێ دا و ب شێوەكێ نه‌ ئاسایی دیدار و کۆمبوون ل گەل هێزێن تورکیا ل وێ ده‌ڤه‌رێ كرینه‌.  

بریکارێ وەزارەتا دەرڤه‌ یا ئێراقێ گۆتییه‌ ژى، حکومەتا ئێراقێ وان پێشێلکاریێن بەردەوام یێن ل سەر سەروەریا ئاخ و ئه‌سمانێ ئێراقێ رەت دكه‌ت، یێن كو ژ لایێ هێزێن سەربازی یێن تورکیا ڤە دهێنه‌ كرن.