قانوونا برێڤەبرن و پاراستنا شوونواران هاته‌ پەسەندکرن

پشتى گوتۆبێژێن زۆر یێن ئه‌ندامانێن په‌رله‌مانێ كوردستانێ، ب‌ ده‌نگێ 74 په‌رله‌مانتاران قانوونا برێڤه‌برن و پاراستنا شوونواران هاته‌ په‌سه‌ند كرن، ئه‌و پرۆژە ژ 34 مادان پێکھاتییه‌، ب ڤی چه‌ندێ ئێدى كار ب قانوونێن ئێراقێ ناهێته‌ كرن، شوونەوار و کەلەپوورێن ھەرێما کوردستانێ دێ ب ڤى قانوونێ هێته‌ پاراستن، لدووڤ قانوونا نوو شوونوارێن ھەرێما کوردستانێ دێ بنه‌ ئیك ژ ژێده‌رێن داھاتى بۆ ھەرێما کوردستانێ.

ل دووڤ ڤى قانوونێ ھەر جهه‌كێ ژیێ وى ژ 200 سەد سالان و پتر بیت دێ وه‌كو شوونوار هێته‌ تۆماركرن و ئەو کەره‌ستێن ژیێ وان ژ 150 سالان پتر بیت، ئەو دێ وه‌كو کەلەپوور هێنه‌ ھژمارتن.

ل گۆره‌ى وێ قانوونێ رێڤه‌به‌رییا گشتی یا شوونواران دێ هێته‌ گوهۆرین بۆ رێڤەبەرییا گشتی یا شوونوار و کەلەپووران ل ھەرێما کوردستانێ.

هه‌روه‌سا سزایێ وان كه‌سێن شوونواران ددزن 10 سالێن زیندانێ نه‌ و  شەش جاران ھندی بهایێ وى شوونوارى دێ سزایێ مادى ژى ده‌ت.