پارێزگارێ دهۆكێ: ئه‌م كه‌فتینه‌ دناڤبه‌را دو به‌رداشێن هه‌ردو لایان دا

پارێزگارێ دهۆكێ ئه‌ڤرۆ سه‌ره‌دانا نه‌خۆشخانا ته‌نگاڤیان ل دهۆكێ كر ژبو هایداربوون ژ ره‌وشا بریندارێن په‌قینا ئه‌ڤرۆ یا ده‌ڤه‌را كانی ماسێ، د به‌رسڤه‌كێ دا ل پرێس كونفرانسه‌كی راگه‌هاند “ئه‌م كه‌فتینه‌ دناڤبه‌را دو به‌رداشێن هه‌ردو لایان دا”

د. عه‌لی ته‌ته‌ر ل دور روودانا ئه‌ڤرۆ یا یا ده‌ڤه‌را كانی ماسێ راگه‌هاند: دوهی ژ ئه‌نجامێ شه‌رێ دناڤبه‌را په‌كه‌كێ و توركیا دا تۆپه‌كا له‌شكه‌رێ توركیا ب بورجه‌كێ كاره‌بێ كه‌فتیه‌ و ژ ئه‌گه‌رێ وێ چه‌ندێ گوندێن ده‌ڤه‌را كانی ماسێ ماینه‌ بێ كاره‌ب، ئه‌ڤرۆ سپێدێ مه‌ تیمێن سه‌خبێریا رێڤه‌به‌ریا كاره‌بێ هنارتینه‌ بۆ وێ یه‌كێ كاره‌بێ چاك بكه‌ن، ب مخابنی ڤه‌ په‌كه‌كێ لسه‌ر رێكا وان بومبه‌ك ب تیمێ كاره‌بێ ڤه‌ په‌قاندیه‌ و سێ كه‌س بریندار بوینه‌.

پارێزگارێ دهۆكێ گوت ژی: ژ ئه‌نجامێن هێرشێن توركیا زیان گه‌هشتینه‌ مه، و بو چێكرنا وان زیانان ژی په‌كه‌كه‌ هێرشی مه‌ دكه‌ت و گوت “ئه‌م كه‌فتینه‌ دناڤبه‌را دو به‌رداشێن هه‌ردو لایان دا”

د. عه‌لی ته‌ته‌ر ئاشكرا ژی كر: مه‌ نه‌ڤێن شه‌رێ وان دناڤ ئاخا هه‌رێما كوردستانێ دا بیت، ئه‌م داخازێ ژ هه‌ردو لا دكه‌ین شه‌رێ خوه‌ ببه‌نه‌ دناڤ ئاخا خوه‌ دا چونكه‌ زه‌ره‌رمه‌ندێ سه‌ره‌كی خه‌لكێ مه‌ یه‌، ژ ئه‌نجامێ شه‌رێ وان ئه‌م دهێینه‌ كوشتن و ژ ئه‌نجامێ شه‌رێ وان گوندێن مه‌ ماینه‌ چۆل و ناهێنه‌ ئاڤاكرن.