بارەگه‌هێ بارزانی دەربارەی دراندن و ھاڤێتنا لاپەرێن قورئانا پیرۆز ل جادەکا ھەولێرێ راگەھاندنەک بەلاڤکرییە و راگەھاندییە، کو سڤکاتیکرن ب پیرۆزیێن خەلکی بابەتەکێ مەترسیدارە و ب چ شێوەییان ناھێتە قەبوولکرن.
شەڤا بوری ژنەکا بناڤێ بنار سرێشمەیی ڤیدیۆیەک د فەیسبۆکا خوەدا بەلاڤکربوو، کو چەند لاپەریێن قورئانێ ب دراندی ل سەر جادا 100 مەترییا ھەولێرێ کۆمڤەدکەت، ئەڤێ چەندێ ژی کارڤەدانێن خەلکی ل دووڤ خوەرا ھێلاینە.
بارەگه‌هێ بارزانی دەربارەیی ئەوێ روودانێ راگەھاند، ئەوی ھەموو سنۆر بەزاندینە و ھێلەکا سوورە و داخوازێ ژ لایەنێن پەیوەندیدار دکەین کو پێداچوونەکێ د ڤی بابەتیدا بکەن و دڤێت رێک ل ڤان جۆرە تاوان و رەفتارێن نە ژ ھەژی بھێنەگرتن.
د پشکەکا دی یا راگەھاندنێ دا ھاتییە، ھەر کەس و لایەنەکێ ل پشت ڤێ کریارێ بیت، دێ ھێتە سزادان و مەرەما وی تێکدانا ئاسایشا جڤاکیی و فیتنەگیرێیە.
