په‌یڤدارێ ب ناڤێ ئۆپه‌راسیۆنێن هه‌ڤپشك لیوا ته‌حسین ئه‌لخه‌فاجى ره‌تكر ب هه‌بوونا چه‌كداران د ناڤ قه‌زا شنگالێ دا، و ئاماژه دا كو بریاردان ل سه‌ر بۆدجێ دێ 80% یا ئاریشێن قه‌زا شنگالێ چاره‌سه‌ركه‌ت.
ئه‌لخه‌فاجى، د دیداره‌كا ته‌له‌فزیۆنى دا دیاركر، رێككه‌فتنا شنگالێ هاتییه چه‌سپاندن، و به‌غدا یا پیگیره، ژ هێزێن ئێمناهیێ و چه‌سپاندنا مادده‌یێن وێ، و ده‌ست ب كریارێن به‌لاڤكرنا چه‌كداران یێن گرێدایى ب له‌شكه‌رێ ئیراقێ ڤه و پولیسێن نافخۆیى و به‌لاڤكرنا وان هاتینه كرن.
و سه‌باره‌ت هه‌بوونا دیارده‌یا چه‌كداران ل قه‌زایا شنگالێ، وى ئه‌ڤ چه‌نده ره‌تكر و گۆت: ئه‌ڤ چه‌نده د ناڤ شنگالێ دا نینه، و ئه‌م ناهێلێن كو پارتا كاركه‌رێن كوردستانێ و هه‌ر ئێكا دى دگه‌ل هێزێن ئێمناهیێ هه‌بیت، مه له‌شكه‌رێ ئیراقێ و پۆلیسێن نافخۆ د ناڤ شنگالێ و ده‌وروبه‌ران دا به‌لاڤكرینه، و هه‌موو ژى ل ژێر ده‌ستهه‌لاتا هێزێن ئێمناهیێن ئیراقا ئیتحادى دانه، هه‌روه‌كو چه‌وا رێككه‌فتن ل سه‌ر هاتییه كرن.
پێنگاڤا ئێكێ یا رێككه‌فتنا شنگالێ هاتییه جێبه‌جێكرن، ئه‌و ژى ده‌رێخستنا گرۆپێن چه‌كداران ژ شنگالێ، و یا دووێ ژى به‌لاڤكرنا هێزێن ئێمناهیێ ناڤ شنگالێ و ژ ده‌رڤه‌ى شنگالێ و ل دووڤ رێككه‌فتنێ، و ئه‌ڤ چه‌نده ژى هاته كرن، به‌لێ پۆلیسێن ناخۆیى دكێمن، به‌لێ پشتى هنده‌ك ژ خه‌لكێ شنگالێ یێن ئێزدى دهێنه دامه‌زراندن دێ هژمارا وان د رۆژانێن بهێت دا زێده‌بن.
