فره‌نسا دێ نه‌خۆشخانه‌یه‌‌كێ ل شنگالێ ئاڤاكه‌ت

نڤێسینگه‌ها ئه‌عره‌جى د راگه‌هاندنه‌كێ دا ئه‌ڤرۆ چوار شه‌مبى 3-3-2021ێ راگه‌هاندییه، وان پێشوازییا برنۆ ئوبیر بالیۆزێ فره‌نسا ل به‌غدایێ كر و به‌حسێ داوى پێشهاتێن سیاسى و ئێمناهیێ ل ئیراقێ و ده‌ڤه‌رێ هاتنه‌ كرن، هه‌روه‌سا چه‌وانییا به‌رفره‌هكرنا په‌یوه‌ندیان د ناڤبه‌را به‌غدا و پاریسێ دا و هه‌ر تشته‌كێ د به‌رژه‌وه‌ندییا هه‌ردوو وه‌لاتاندا هه‌بیت گۆتوبێژكرن.‌

ئه‌عره‌جى دووپاتكر ژى كو وان نه‌ڤێت ئیراق ببیته‌ گۆره‌پانا هه‌ڤركییان.

ئه‌عره‌جى دگه‌ل بالیوزێ فره‌نسى به‌حسێ به‌رده‌وامییا هاریكاریكرنا ئیراقێ كرن و ب تایبه‌ت ده‌ڤه‌رێن رزگاركرى.

بالیوزێ فره‌نسا دیاركر ژى كو وه‌لاتێ وى دێ نه‌خۆشخانه‌كێ ل قه‌زا شنگالێ ئاڤاكه‌ت، و وان به‌رێ بنیاتى بۆ نه‌خۆشخانێ دانایه‌ و به‌رهه‌ڤییا خوه‌ دیاركرییه‌ بۆ پتر هاریكاریكرنێ.