نه‌ته‌نیاهۆ: ژ هه‌موو لایان ڤه‌ دێ ل ئیرانێ ده‌ین

سه‌رۆكوه‌زیرێن ئسرائیلێ راگه‌هاند، ئیرانێ ل كه‌نداڤى هێرشى كه‌شتییا وان كرییه‌ و دێ ژ هه‌موو لایان ڤه‌ ل ئیرانێ ده‌ن.

بنیامین نه‌ته‌نیاهۆ، سه‌رۆكوه‌زیرێن ئسرائیلێ راگه‌هاند، ئیران ل پشت وان هێرشایه‌ یێن ل كه‌نداڤى ل سه‌ر هیزێن وان هاتینه‌كرن و ئه‌و دێ تۆلا خوه‌ ڤه‌كه‌ن و ژ هه‌موو لایان ڤه‌ دێ ل ئیرانێ ده‌ن.

نه‌ته‌نیاهۆ ئیرانێ ژ وێ هێرشا ل سه‌ر كه‌شتییا بارهه‌لگر هاتییه‌كرن ل ده‌ریا عومانێ ب به‌رپرس دزانیت و دوپاتى ژى ل سه‌ر وێ یه‌كی كر كو ئسرائیل رێ ب ئیرانێ ناده‌ت ببیته‌ خودان چه‌كێ ئه‌تۆمى و ئیران ئه‌گه‌رێ نه‌ئارامییا ده‌ڤه‌رێ یه‌.

كه‌شتییا بارهه‌لگر یا ئیم ڤى هیلیۆس ره‌ى ل رۆژا ئێكشه‌مبى پشتى ژ به‌نده‌رێ ده‌مام ل رۆژهه‌لاتێ ئه‌ره‌بستانا سعوودیێ به‌ر ب ته‌نگئاڤا هورمز ب رێكه‌فتى و گه‌هشتییه‌ ده‌ریا عومانێ، ژلایێ هێزێن ده‌ریایى یێن ده‌ڤه‌رێ هاته‌ نه‌چاركرن ڤه‌گه‌ریته‌ به‌نده‌رێ ئیماراتێ بۆ پشكنینان و ل ده‌مێ ڤه‌گه‌ریانێ بۆمبه‌ك پێڤه‌ په‌قى.

رۆژنامه‌یه‌كا ئیرانى یا نیزیك ژ بالێ تۆندره‌وان ئاماژه‌ ب ئه‌گه‌رێ هێرشێ ژلایێ به‌ره‌یێ مقاومێ ڤه‌ كربوو وه‌ك ئاماژه‌یه‌ك بۆ په‌قینێ ژلایێ لایه‌نگرێن ئیرانێ ڤه‌.

پێشتر ژى بێنى گانتز، وه‌زیرێ به‌رگرییێ یێ ئسرائیلێ راگه‌هاندبوو ، ل گوره‌ى ئه‌نجامێن ده‌ستپێكى یێ ب ده‌ست ئسرائیلێ كه‌فتین ئاماژه‌ دیاردكه‌ن كو ئیرانێ ده‌ست د وێ په‌قینێ دا هه‌بیت.