تەرمێ ١٣ سڤیلان د شکەفتا گارەی دا گۆمان دروست کرینە

داخویانیێن وەزیرێ بەرگرییا تورکیا ل دۆر کوشتنا ١٣ کەسان د شکەفتەکا پەکەکێ دا ل چیایێ گارەی، گۆمان د ناڤا شرۆڤەکار و ناڤەندێن سیاسی و ئۆپۆزسیۆنا تورکیا دا پەیدا کرییە، پشکەک ژ وان ژی دبێژن: ھەبوونا ١٣ کەسێن سڤیل ل دەڤەرا گەرما شەری چ رامانێ ددەت و بۆچی پێشتر رەڤاندنا وان نەھاتیە راگەھاندن.
خلۆسی ئاکار، وەزیرێ بەرگرییا تورکیا دوھی داوی ھاتنا ئۆپەراسیۆنا وان ل چیایێ گارەی راگەھاند بوو و ئاشکرا کر بوو، ٤٨ گەریلایێن پەکەکێ کوشتینە، تەرمێن ١٣ کەسێن سڤیل ژی کو وەلاتیێن تورکیا نە د شکەفتەکا وێ حزبێ دا ھاتینە دیتن کو پێشتر ھاتبوون رەڤاندن.
داخویانیێن وەزیرێ بەرگرییا تورکیا گۆمان ل نک ناڤەندێن سیاسی و ئۆپۆزسیۆنا تورکیا دروست کرییە، پشکەکا شرۆڤەکارێن تورک دبێژن، ئەو ھەژمارا مەزن یا سڤیلان چاوا گەھشتیە وێ دەڤەرا سەربازی یا ب ترس و ئاشکرا دکەن، دبیت ئەو سڤیل ئەو بن یێ سوپایێ تورکیا د ئۆپەراسیۆنێن خوەدا ل باکورێ کوردستانێ رەڤاندین و پاشی ڤەگوھاستینە ھەرێما کوردستانێ بۆ بەرزەکرنا کوشتنا وان، یان ژی ئەو کارمەندێن میتێ نە یێن ل وان دەڤەران دژی پەکەکێ کار دکر، لەورا خلۆسی ئاکار دبێژیت ژبەر ئەگەرێن ئەمنی رەڤاندنا وان نەھاتبوو راگەھاندن، کوشتنا وان کەسان ژی ل وێ دەڤەرا شەری ب تنێ بۆ تێکدانا ناڤێ پەکەکێ یە، پەکەکێ ب خوە ژی تا نھا چ داخویانی ل سەر وێ یەکێ نەداینە.
ژ ئالییەکێ دی ڤە سیاسەتمەدار و ئۆپۆزسیۆنا تورکیا داخوازا رۆھنکگرنەکا بەرئاقل ژ حکومەتێ دکەن کا ئەو سڤیل چاوا گەھشتینە وێ دەڤەرێ، یان ژی سوپایێ تورکیا ئەو سێدارەداینە و پاشی ڤەگوھاستینە وێرێ یان ژی ب ئەرکێن ئەمنی ل وان دەڤەران بوون.
ژ ئالییەکێ دی ئاژانسا بلۆمبێرگ یا ئەمریکی د راپۆرتەکێ دا ئاشکرا کرییە، ئەو راگەھاندنا تورکیا ل دۆر کوشتنا ١٣ سڤیلان ل چیایێ گارەی، خزمەتا ھەوا ئەنقەرە دکەت بۆ داوی ئینانا پشتەڤانییا ئەمریکا ل ھێزێن سووریا دیمۆکرات ل سووریێ کو ب بالەکێ پەکەکێ دزانن.