سه‌رۆك بارزانى و جینین پلاسخارت ره‌وشا ده‌ڤه‌رێ گۆتوبێژكرن

سه‌رۆك بارزانى پێشوازى ل هنارتییا سكرتێرێ گشتیێ رێكخراوا نه‌ته‌وێن ئێكگرتى كر.

ئه‌ڤرۆ رۆژا ئێكشه‌مبى 14 شوباتا 2021ێ ل سه‌لاحه‌دین سه‌رۆك بارزانى پێشوازى ل خاتوون جێنین پلاسخارت هنارتییا تایبه‌تا سكرتێرێ گشتیێ رێكخراوا نه‌ته‌وێن ئێكگرتى ل ئیراقێ كر.

د دیداره‌كێ دا بیروبۆچوون ده‌رباره‌یى ره‌وشا سیاسى و پێشهاتێن ئیراقێ و دانوستاندنێن د ناڤبه‌را هه‌رێما كوردستانێ و حكوومه‌تا فیدرال، هه‌روه‌سا ئاسته‌نگێن به‌رامبه‌رى جێبه‌جێكرنا رێككه‌فتنێ و ئاسایكرنا ره‌وشا شنگالێ گۆتوبێژكرن.

د وێ روینشتنێ دا هنارتییا سكرتێرێ گشتیێ رێكخراوا نه‌ته‌وێن ئێكگرتى ل ئیراقێ جه‌خت ل هندێ كرییه‌ كو نه‌ته‌وێن ئێكگرتى پشته‌ڤانییا حكومه‌تا هه‌رێما كوردستانێ و حكومه‌تا فیدرالا ئیراقێ كرییه، كو به‌رده‌وام بن ل سه‌ر دیالۆگ و ره‌خساندنا كه‌شه‌كێ ئه‌رینى بۆ سه‌رخستنا دانوستاندنان و ب ده‌ستڤه‌ ئینانا چاره‌سه‌ریێن گونجایى بۆ كێشه‌یێن د ناڤبه‌را وان دا‌.

هه‌ر د وێ كۆمبوونێ دا سه‌رۆك بارزانى پشته‌ڤانییا خۆ بۆ دیالۆگا به‌رده‌وام یا د ناڤبه‌را حكومه‌تا هه‌رێما كوردستانێ و حكومه‌تا فیدرالا ئیراقێ د چوارچووڤێ ده‌ستووری دا راگه‌هاند، و ئه‌و یه‌ك ژى دووپاتكرییه‌ كو ئه‌گه‌ر ل سالانێن بۆری دا ده‌ستوور وه‌ك خۆ هاتبا جێبه‌جێكرن، گه‌له‌ك ژ وان كێشه‌ و ئاریشه‌یان نه‌دبوون، كو نوكه‌ د ناڤبه‌را هه‌ردوو لایه‌نان دا هه‌نه‌.