فرۆشیارەکی ل بازارێ دھۆکێ دیارکر، ل دەمێن بووری رێژا خازخازۆکان ل ناڤا بازاری زێدە بوویە و خەلک بێزارکرییە.
حاجی ئەحمەد، فرۆشیار ل بازارێ دھۆکێ بۆ خانی نیوز دیارکر، دەمێ پازدە سالانە ئەو فرۆشیارە ل بازاری، لێ ل ڤان دو سالان رێژا خازۆکان زێدەبوویە و گەلەک ژ وان کەسان ژی ب سالایە د ناڤا بازاری دا بۆ خو کرییە کارەکێ رۆژانە و بکڕان بێزار دکەن.
خازۆکەکی ژی گۆت، ژ بێکاری و نەچارییا خوە ئەو ڤی کاری بۆ زارۆکێن خوە دکەت، راستە کارەکێ نە دروستە لێ ژ نەچارییا خوە ئەو ڤی کاری دکەن، لێ ھندەک کەس ھەنە دگەل وان خازۆکییێ دکەن و د پێدڤی نینن.
ژێھات چەلکی، شارەزایێ جڤاکی دیارکر، ھندەک خازۆک ھەنە بۆ خوە کرییە کارەکێ رۆژانە و نەشێن دەستا ژێ بەردەن، ھندەک کەس ژی ھەنە ب تنێ بۆ سەردابرنا خەلکی ڤی کاری دکەن و ھندەک کەس ژی ب نەچاری وی کاری دکەن لێ ئەو کەس دکێمن و گەلەک جاران خەلک وان کەسان ژی نانیاسن ژبەرکو ل بەر خەلکی بەرزەبوویە کی پێدڤی یە و کی نە.
ژێھات چەلکی گۆت ژی: پتریا وان کەسێن ڤی کاری دکەن ئەون یێن بۆ خوە کرینە کارێ رۆژانە، ژبەرکو ئەو کەسێن پێدڤی شەرم دکەن و ھەتا گەلەک نەچارنەبن وی کاری ناکەن، ئەگەرەکێ دی ژی ئەوە چ رێکار بەرامبەر وان کەسان ناھێنە وەرگرتن یێن ڤی کاری دکەن.
ل دۆر چارەسەرییا وێ دیاردێ ژی ژێھات چەلکی گۆت: پێدڤییە حکومەت رێکارێن توند بۆ وان کەسان بگیتە بەر و ھەر کەسێ ڤی کاری بکەت و خەلکی بێزاربکەت بھێتە سزادان. خەلک ژی زی باوەر ژ وان کەسان نەکەن یێن ڤی کاری دکەن، ھەک خەلک پاران نەدەنە ڤان جۆرە کەسان بێگۆمان خازۆک دێ ڤی کاری ھێلن.
خانی نیوز: مەنیجا ئەیوب
