حکومەتا ئیراقێ سێ پێشنیار داینە شاندێ ھەرێما کوردستانێ، داخواز ژ شاندێ ھەرێمێ کرییە، وان پێشنیاران بجھـ بینن، داکو ئەو ژی شایستەیێن دارایی و پشکا ھەرێمێ د بودجێ گشتی یێ ئیراقێ دا بۆ سالا ٢٠٢١ بنەجھـ بکەن.
دھێتە چاڤەرێکرن دڤێ حەفتییێ دا جڤاتا نوونەرێن ئیراقێ دەنگدانێ ل سەر پڕۆژە قانوونا بۆدجێ ئیراقێ یێ سالا ٢٠٢١ بدەت.
د. به‌شیر حه‌داد جێگرێ سەرۆکێ جڤاتا نوونەرێن ئیراقێ راگەھاندییە، د نوکە دا گوتۆبێژێن شاندێ حکومەتا ھەرێما کوردستانێ ل گەل ئالیێن سیاسی و پەیوەندیدار یێن ئیراقێی د بەردەوامن و ھەتا نوکە دانوستاندن د ئەرێنینە.
د. بەشیر حەداد دیار کر ژی، ڤی جارێ حکومەتا ئیراقێ سێ پێشنیار بۆ شاندێ ھەرێما کوردستانێ دیار کرینە، ژ وان ژی ھەرێم بادەکا نەفتێ ب تەمامی رادەستی بەغدا بکەت، دیسان رۆژانە ٤٥٠ ھزار بەرمیلێن نەفتێ رادەستی بەغدا بکەت، ھەروەسا رۆژانە داھاتێ ٢٥٠ ھزار بەرمیلێن نەفتێ ل دووڤ بھایێ کۆمپانییا سۆمۆ بفروشیتە وان و رادەستی ئیراقێ بکەت، دیسان پێدڤییە حکومەتا ھەرێمێ ٥٠% ژ داھاتێ دەروازەیێن سنوری ژی رادەستی حکومەتا بەغدا بکەت.
