پشتی هژمارەکا گەشتیاران ب مەرەما گەشت و گۆزارێ قەستا سەرێ چیایێ گارەی کری ل سنورێ دەڤەردارییا ئامێدیێ و ژ ئەگەرێ هاتنا بەفرێ ب ترومبێلڤە ئاسێ بووین و مانە دناڤ سر و سەرما و بەفرێ دا، تیمەکا رامالینا بەفرێ دگەل پۆلیسێن چەمانکێ و سەرسنکێ پشتی هەول و بزافەکا زۆر شییان هەر بیست کەسێن ئاسێ بووى ب سلامەتی رزگار بکەن.
ئەلند ئەمیر رێڤەبەرێ ناوچەدارییا چەمانکێ بۆ خانی نیوز گۆت: ئەڤرۆ هژمارەکا گەشتیارێن سنورێ پارێزگەها دهۆکێ ب مەرەما گەشت و گۆزارێ قەستا سەرێ چیایێ گارەى کربوون، لێ جهێ داخێ یە کو ژ ئەگەرێ بارینا بەفرەکا زۆر ئاسێ ببوون.
ناڤهاتى زێدەتر گوت: تیمەکا رامالینا بەفرێ و پۆلیسان پشتی بزاڤێن زۆر شییان خوە بگەهینن چیایی و وان گەشتیاران رزگار بکەن، نوکە هەمی کەس رزگاربووینە و ل سەرێ چیایی دهێنە خوارێ و تیمێن رامالینا بەفرێ ل بەراهییا وان دهێن، لێ ترومبێلێن وان ماینە ل وێرێ.
رێڤەبەرێ ناوچەدارییا چەمانکێ دیارکر ژی: تیمێن وان دگەل پۆلیسان د دەما 24 دەمژمێران دا د خزمەتا وەلاتییان دانە بۆ ڤەکرنا رێکان و گۆت ژی: ئەو داخوازێ ژ هەموو گەشتیار و وەلاتییان دکەن کو بێى زاییاری قەستا جهێن مەترسی و بەفرین نەکەن داکو چو کێشە بۆ وان دروست نەبن، دیسان هەر وەلاتیەک ژی پێدڤی ب هەڤکاریێ بیت، بلا بلەز تیمێن وان ئاگەهدار بکەن داکو بشێن وان بێ کێشە رزگار بکەن.
خانى نیوز، هەیوار ستار
