سەرەراى هندێ كو ئیراق وه‌لاته‌كێ په‌ترۆلى یه و داهاته‌كێ مه‌زن ژ فرۆتنا وى ژێده‌رێ سروشتى ب ده‌ست دكه‌ڤیت، بەلێ ئه‌و چه‌نده نه‌بوویه هۆکاره‌ک بۆ خۆشكرنا ژیارا خه‌لكى و ئێك ل سه‌ر پێنجێ یا خۆجهێن ئیراقێ ل ژێر هێلا هه‌ژاریێ دانه.
ل دووڤ ئامارێن فەرمی یێن كۆمپانیا سۆمۆ، سه‌رجه‌مێ هنارتنا په‌ترۆلێ ل سالا بوورى گەهشتییه ملیاره‌ك و 96 ملیۆن و 345 ھزار بەرمیلان، هه‌یڤانه 91 ملیۆن و 362 ھزار بەرمیل هنارتینه، تێكرایا رۆژانە ژى گەهشتییە دو ملیۆن و 362 ھزار بەرمیلان، ئەو داهاتیێ ژ فرۆشتنا په‌ترۆلا خاڤ بده‌ستڤه هاتى، گەهشتییە 41 ملیار و 755 ملیۆن دۆلاران، كو هه‌یڤانه دبیته 3 ملیار و 479 ملیۆن دۆلار.
ل دووڤ دووماهى ئامارا وەزارەتا پلاندانانا ئیراقێ یا تایبەت ب ھەژاریێ ڤه ئاشكرا بوویه، نێزیكی 10 ملیۆن ئیراقییان ل ژێر ھێلا ھەژاریێ دژین، پێڤه‌رێن هه‌ژاریێ ژى ل سەر بنەمایێ ساخله‌مییێ، ئاكنجیبوونێ، پەروەردێ ، داھاتى، پێدڤیین خوارنێ هاتینه كرن.
عەبدولزەھرە ئەلھنداوی، په‌یڤدارێ وەزارەتا پلاندانانا ئیراقێ دیار كر، ره‌وشا ئیراق ئه‌ڤه چه‌ندین ساله تێدا ده‌رباز دبیت، بوویە ھۆكار كو ل سالا 2019 رێژا ھەژاریێ ب شێوەكێ بەرچاڤ بلند ببیت و بگه‌هیته 20%، ل گه‌ل هندێ به‌لاڤبوونا كۆرۆنایێ و پاشى قەیرانا دارایی ژ ئەنجامێ داكەفتنا بهایێ په‌ترۆلێ، كارتیكرنه‌كا به‌رچاڤ ل سه‌ر بلندبوونا رێژا ھەژاریێ هه‌بوویه.
