نڤیسەرێ بەرنیاسێ دھۆکێ مامۆستا موسەدق تۆڤی مژوولی نڤێسینا ئێنسکلۆپیدیا نڤێسەرێن دھۆکێ یە و نھا ل قۆتاغێن دوماھیێ یە و ئەو یەک دێ بیە دیرۆکەک بۆ نڤێسەرێن دھۆکێ کو بەرھەمێن وان بھێنە پاراستن.
موسەدەق تۆڤی بۆ خانی نیوز دیارکر، ئێنسکلۆپیدیا نڤێسەرێن دھۆکێ بەردەوامیدانا پرۆژێ ئینسکلۆپیدیا پارێزگەھا دھۆکێ یە ئەوا ل داوییا ٢٠١٧ ب چاپ بووی و ل مەھا نیسانا ٢٠١٨ ھاتییە بەلاڤکرن، دەمێ کار د ئینسکلۆپیدیا پارێزگەھا دھۆک دا دھاتەکرن وی و ھەڤکارێ خوە نڤیسکار خالد سالح ھزر د تەرخانکرنا بەرگەکێ ئینسکلوپیدیایێ دا بۆ ناڤدارێن پارێزگەھێ دکر، بەلێ ژ ئەنجامێ چەند ئەگەران ئەو کار نەھاتە کرن و پشتی بەلاڤبوونا ئینسکلۆپیدیایێ ب سالەکی ئانکو سالا ٢٠١٩ سەر ژنوو ئەو ھزرە ڤەژاندەڤە و کرە کریار، لێ وان ب باش زانی ڤێ جارێ تنێ ئینسکلۆپیدیا نڤیسکارێن پارێزگەھا دھۆک بیت و بۆ ڤێ چەندێ داخوازنامەک د چەند مالپەر و رۆژنامەیان دا بەلاڤکر و ھەمان داخوازنامە ب دەست مە گەھاندە سەدان نڤیسکاران.
ل دۆر وان مەرجێن بۆ نڤیسەران ھاتینە دانان تۆڤی دبێژیت: د ڤێ ئینسکلوپیدیایێ دا دێ جھێ ھەر نڤیسکارەکی ھەبیت یێ پرتووکەک یان پتر چاپکر بن، ب ھەر زمانەکی بیت کوردی، عەرەبی، سریانی، ئینگلیزی و زمانێن دیتر و د ھەروارەکی دا نڤیسی بیت، تاکە مەرج ئەوە نڤیسکار خەلکێ پارێزگەھا دھۆکێ بیت.
نڤیسکار موسەدەق تۆڤی گۆت ژی: ل دەسپێکێ ب گەرمی دەسپێکر لێ رەوشا سالا ٢٠٢٠ێ پیچەک پرۆژە گیرۆ کر، لێ کار بەردەوامە، نھا نێزیکی ٣٠٠ نڤیسکاران جھێ خوە د ناڤ رەشنڤیسێ پرتووکێ دا گرتیە و ل بەرە د ئەڤ سالە دا ب داوی بھێت.
ل دووماھیێ ناڤھاتی ب رێکا خانی نیوز داخواز ژ ھەر نڤێسەرەکی کر یێ خەلکێ پارێزگەھێ، یێ ھەتا نھا ژیاننامە و کار و بەرھەمێن خوە نەگەھاندینە وان، ب زووترین دەم بگەھینن دا جھێ خوە د ئینسکلوپیدیا نڤیسکارێن پارێزگەھێ دا بگریت.
