بریتانیا ب فەرمی ژ ئێکەتییا ئەورۆپا دەرکەفت و پرۆسا پەیرەوکرنا یاسایێن ئێکەتییا ئەورۆپا راوەستاند.
بۆریس جۆنسۆن، سەرۆکوەزیرێن بریتانیا راگەھاند، ب چالاکبوونا برێکزتێ ئێدی بریتانیا ئازادی ب دەستخۆەڤەئینا و ژ نھا وێڤە دشێت کارێن خۆە باشتر بکەت.
د گەل گەشبینییا جۆنسۆنی، ھژمارەکا وەزیرێن حکومەتا بریتانیا ھوشداری ژ درستبوونا ئالۆزییان د وارێ رێکخستنا ھاتنوچوونا خەلکی و ترۆمبێلێن بارھەلگر دا، ھەروەسا بجھئینانا قانوونێن بریتانیا ب سەر ئەورۆپییان دا.
وان وەزیران دوپات کر، برێکزێت دێ گوھۆرینان ب دووڤ خۆە دا ئینیت و ئەو یەکە ژی دێ ئالۆزیێن پتر دروست کەت.
پشتی پێنجی سالێن پێکڤەمانا بریتانیا دگەل ئێکەتییا ئەورۆپا، ل رۆژێن دوماھیێ یێن ھەیڤا بووری لەندەن و برۆکسل رێکەفتنا تایبەت ب رێکخستنا کاروبارێن بازرگانی یێن برێکزێت ئیمزاکر و ل دەستپێکا سالا دو ھزار و بیست و ئێکێ بریتانیا و وەلاتێن ئێکەتییا ئەورۆپا وەکی دو لایەنێن بیانی دێ رەفتارێ دگەل ئێکدو کەن.
