ئەندامەکێ جڤاتا پارێزگەھا دھۆکێ ئاشکراکر کو ھاتنا گازا سپی ژ بەغدا بۆ دھۆکێ پار و ئەڤسالە گەلەک کێم بوویە، دھۆکێ پێدڤی ب ٥٥ ملیۆن لترێن گازا سپی یە ھەتا ھەر خێزانەکێ ٢٠٠ لترێن گازا سپی دگەھنێ.
عەبدو سەمەد کۆچەر، سەرۆکێ لژنا سامانێن سروشتی و پیشەسازی ل جڤاتا پارێزگەھا دھۆکێ، ئەڤرۆ رۆژا پێنج شەمبی ٣١/١٢/٢٠٢٠ بۆ خانی نیوز ئاشکراکر، ئەڤسالە حکومەتا ئیراقێ رێژەکا گەلەک کێم ژ گازا سپی بۆ پارێزگەھا دھۆکێ ھنارتیە و گەلەک ب سستی یا دھێتە بەلاڤکرن، ژبەرکو گازا سپی نینە و ھەر چ دھێت ھەر ھەمان رۆژ یا ل سەر خەلکی دھێتە بەلاڤەکرن.
عەبدو سەمەد کۆچەر گۆت: سالا بووری حکومەتا ئیراقێ نێزیکی ھەشت ملیۆن و نیڤ لترێن گازا سپی بۆ پارێزگەھا دھۆک ھنارتن و ھەرێمێ ژی ١٠ ملیۆن دا بوون، ب وێ یەکێ ١٨ ملیۆن لتر ھاتە بەلاڤەکرن، ئەڤسالە حکومەتا ئیراقێ حەفت ملیۆن ٩٠٠ ھزار لتر ھنارتینە، بەرامبەر دھۆکێ پێدڤی ب ٥٥ ملیۆن لترێن گازا سپی یە ھەکە ھەر مالەکێ ٢٠٠ لتر بگەھنێ، ئەڤە ژبلی ئاوارە و فەرمانگەھێن حکومەتێ و جھێن دی.
عەبدو سەمەد گۆت ژی: سالانە حکومەتا ئیراقێ ھەر پارێزگەھەکێ ١٥ ملیۆن لترێن گازا سپی ددانێ بەلێ ھەر دو پارێزگەھێن ھەولێر و سلێمانیێ قەبوول نەکر ب بھانا وێ چەندێ کو رێژا وا ژ دھۆک زێدەترە، ئەڤسالە و پار ل دووڤ رێژا ئاکنجیبوونێ گاز دا خەلکێ دھۆکێ و رێژا زێدەتر گەھشتە ھەولێرێ و ھێشتا زێدەتر گەھشتیە سلێمانیێ ژبەرکو ھەلەبجە ژی ل گەل دایە.
خانی نیوز، سالار محەمەد دۆسکی:
