بالیۆزخانا توركیا ل به‌غدا راگه‌هاند، ئه‌و كه‌سێن سه‌ره‌دانا توركیا دكه‌ن چ برێكا خالێن سنۆرى یان ب رێكا ئاسمانى یان ده‌ریایى پێدڤیه پشكنینێن ڤایرۆسێ كۆرۆنا یێن حه‌فتێ و دو ده‌مژمێران به‌رى سه‌ره‌دانا خوه بكه‌ن و پێدڤیه ئه‌نجام نێگه‌تیڤ بیت تاكو بشێن بهێنه دناڤ ئاخا توركیا دا، ئه‌ڤ بریاره دێ ل 30ى ڤێ مه‌هێ چیته د وارێ بجهئینانێ دا.
ل گۆره‌ى به‌یانناما بالیۆزخانا توركیا ل به‌غدا، ئه‌و گه‌شتیارێن ب رێكا ئاسمانی سه‌ره‌دانا توركیا دكه‌ن ئه‌گه‌ر پشكنینا نێگه‌تیڤ یا كۆرۆنایێ دگه‌ل نه‌بیت نه‌شێت ل فرۆكێ سووار ببیت، ئه‌و كه‌سێن ب رێكا خالێن سنۆری ژى سه‌ره‌دانا توركیا دكه‌ن ئه‌گه‌ر پشكنینا ڤایرۆسێ كۆرۆنا نه‌كربیت دێ ل جهه‌كێ هێنه كه‌ره‌نتین كرن بۆ ده‌مێ حه‌فت رۆژان و ل رۆژا حه‌فتێ دێ پشكنین بۆ هێته كرن و ئه‌گه‌ر ئه‌نجام نێگه‌تێڤ بوو دێ رێك پێ هێته دان سه‌ره‌دانا باژێرێن وه‌لاتێ توركیا بكه‌ت.
