پشتی به‌لاڤكرنا به‌یاننامه‌كێ ب ناڤێ هه‌رێمكرنا كه‌ركوكێ، به‌رپرسه‌كێ بلند پارتى دیاركر، ئه‌ڤه بزاڤه‌كا خرشه، خه‌لكێ كه‌ركوكێ ل ریفراندومێ ده‌نگ ب وێ چه‌ندێ دایه دگه‌ل هه‌رێما كوردستانێ بن.
عه‌دنان كه‌ركووكى، په‌یڤدارێ جڤاتا سه‌ركردایه‌تیا كه‌ركوك-گه‌رمیان یا پارتییا دیموكراتا كوردستانێ، بۆ خانى نیوز گۆت: بزاڤێن ب هه‌رێمكرنا كه‌ركووكێ هزره‌كا نوو نینه و بزاڤه‌كا خرشه، كێشه‌یا كه‌ركووكێ كه‌یسه‌كا مه‌زنه ل سه‌ر ئاستێ ناڤخوه و هه‌رێمایه‌تى.
كه‌ركووكى ئاماژه ب وێ چه‌ندێ ژى كر، ئه‌و هه‌رێمكرنا كه‌ركووكێ ب هه‌ر شێوه‌كى ره‌ت دكه‌ن، به‌لگه‌یێ وان ژى ئه‌وه ل ریفراندۆما سه‌رخوه‌بوونێ دا پێنجسه‌د و حه‌فتێ هزار و هه‌شسه‌د و سیهـ و شه‌ش كه‌سان ده‌نگ ب سه‌رخوه‌بوونا كوردستانێ دایه، وێ یه‌كێ ژى بۆ دۆست و دوژمنان سه‌لماند چاره‌نڤیسێ كه‌ركووكێ دگه‌ل هه‌رێما كوردستانێ یه.
عه‌دنان كه‌ركووكى زێده‌تر گۆت، خه‌لكێ كه‌ركووكێ بتنێ ب وێ چه‌ندێ رازى دبن ئه‌گه‌ر ڤه‌گه‌رنه سه‌ر ب كوردستانێ ڤه، له‌وما ئه‌ڤ بانگه‌شا هه‌رێمكرنا كه‌ركووكێ یا خرشه و پێدڤیه ئه‌و كه‌س ده‌ستان ژڤى كارى به‌رده‌ن.
خانی نیوز، عه‌زیز هه‌ورامى
