ب هەماهەنگی دگەل پشكا ڕۆشەنبیری و ڕاگەهاندنا پارتی دیموكراتی كوردستان، ژلایێ ئینستیتۆتا كوردی ڤە ل لۆزان، كۆنفرانسەك ب ناڤۆنیشانێ ( لێگەریان ل دووڤ سەربەخۆییا كوردستانێ و ئاشتییێ ل دەڤەرێ) ل باژارێ لۆزان یێ سویسری ب ڕێڤەچوو.
فێستیڤالا نەهێ یا سالیادا ڕیفراندۆما سەربەخۆییێ ب ڕێبەرییا سەرۆك بارزانی و سەركەڤتنا ئیرادەیا گەلێ كوردستانێ، ب سروودا نەتەوەیی (ئەی ڕەقیب) دەستپێكر، هەر دناڤ كۆنفرانسیدا، ژمارەكا پەیامێن سەرۆك بارزانی سەبارەت ڕیفراندۆمێ و ڕۆژێن ڕیفراندۆمێ هاتنە نیشاندان كو ڤەگەریانەك بوو بۆ دیرۆكا پری شانازییا ڕۆژێن ڕیفراندۆمێ.
دووڤدا دۆكیۆمێنتارییەك هاتە پێشكێشكرن، كو تێدا هونەرمەندێ ب ناڤودەنگ یێ كورد، شڤان پەروەر، بەحسی دیرۆكا كوردی و خەباتا گەلێ كوردستانێ دكر.
د كۆنفرانسیدا پانێلێك ب ڕێڤەچوو تەوەرێن وێ پێكهاتبوون ژ ( كوردستان دناڤ جیهانا مۆدێرندا چ جهـ و ڕۆلەكێ گرنگ هەنە؟، ڕیفراندۆما سەربەخۆییا كوردستانێ مە فێری چ دكەت؟ و پاشەرۆژا پرسا كورد و كوردستانێ ل ڕۆژهەلاتا ناڤین)، هەر ئێك ژ د، سالار عوسمان بەرپرسێ پشكا ڕوشەنبیری و ڕاگەهاندنا پارتی دیموكراتی كوردستان، نەجات زانیار، سەرۆكێ ئینستیتیۆتا كوردان ل لۆزان، نازیلە ئەفخامی جێگرا سەرۆكێ ئینستیتیۆتا كوردی ل لۆزان دڤی پانێلیدا د پشكداربوون.
د، سالار عوسمان بەرپرسێ پشكا ڕەوشەنبیری و ڕاگەهاندنا پارتی دیموكراتی كوردستان، ڤەكۆلینەك پێشكێشكر و ڕاگەهاند، ( سەرۆك بارزانی، ڕابەرێ ڕاستكرنا دیرۆكێیە، ڕیفراندۆم ئەو پرۆسەیا مەزنا دیرۆكییە كو پێیەكێ وێ دناڤ ڕاستییێ دایە و پێیێ دی د ناڤ دیموكراسییێ دایە، سەرۆك مەسعود بارزانی ب پشتەڤانییا گەلێ خۆ ڕێبەرایەتی كر، بارزانی ڤییا ب پۆزەتیفانە دەستكارییا دیرۆكێ بكەت و بێژیتە هەموویان: كورد نە پلە دوونە).
دپشكەكا دییا پەیڤا خۆدا، بەرپرسێ پشكا ڕوشەنبیری و ڕاگەهاندنا پارتی دیموكراتی كوردستان ڕاگەهاند، ( هندی ژیان هەبیت، دڤێت نە ب تنێ كورد، بەلكو هەموو ئازادیخواز شانازییێ ب ڕیفراندۆما سالا 2017ێ یا هەرێما كوردستانێ و دەنگدەرێن سەربەخۆییخوازێن كوردستانێ ببەن، دناڤ وێ شانازییێ ژی دا، ڕۆل و ڕێبەرییا سەرۆك مەسعود بارزانی ب پیتێن زێرین بنڤیسن و نڤش ل دووڤ نڤشی ب سەرڤەرازی بخوینن).
دپشكەكا دییا پانێلیدا، نازیلە ئەفخامی ڤەكۆلینەك ل سەر ڕۆژهەلاتا كوردستانێ و چارەسەرییا سیاسی پێشكێشكر، پاشان نەجات زانیار د ڤەكۆلینێدا بەحسی كوردان و قانوونێن نێڤدەولەتی كر، سەبارەت هندێ كا چ بهێتەكر باشە بۆ تێگەهشتنێ دقانوونێن نێڤدەولەتی دا تایبەت ب بابەتێ كوردی، دووڤدا دانوستاندنێن بەرهەمدار ل دۆر ئەڤان بابەتان هاتنە كرن.
پاشان نڤار مالەیی، وەكو گەنجەك كو ل ئورۆپا مەزن بوویە، بەحسی هەستێ نشتیمانپەروەری دناڤ گەنجاندا كر وەكو بنەمایەك بۆ سەربەخۆییا كوردستانێ، هەروەسا تیشك خستە سەر قووناغا نوكە یا كوردان و پێنگاڤ هاڤێتن بەرەڤ پاشەرۆژەكا گەش، ناڤبری ئاماژە ب هندێ دا، گرنگە هەموو لایەك ل دەوروبەرێن ئەزموونا هەرێما كوردستانێ وەكو ئەزموونەكا سەركەڤتییا حوكمرانییێ كۆمببن.
هەروەسا د پشكەكا دییا كۆنفرانسیدا، ئاسۆ پیرۆتی بابەتەكێ گرنگ سەبارەت پەروەردە و كولتووری دبیاڤێ سیاسیدا پێشكێشكر و ڕاگەهاند، ( حكومەتا هەرێما كوردستانێ و ئەزمونا هەرێما كوردستانێ چەترێ كۆمكرنێیە بۆ هەموویان).
هەژی گوتنێ یە، نوونەرێن هێز و لایەنێن سیاسییێن كوردستانێ ل دیاسپۆرا و ڕەڤەندا كوردی ل سویسرا دئەڤی كۆنفراسیدا دپشكداربوون و پەیامێن خۆ پێشكێشكرن، ل دووماهییێ ب كرنا چەند دانوستاندنێن ئەكادیمی، كۆنفرانس ب دووماهی هات.
