ب فەرمانا مەسرور بارزانی ل حەفتییا بهێت 33 وەلاتی ژ لیبیا دێ ڤەگەرنەڤە هەرێما كوردستانێ

 

ب فەرمانا مەسرور بارزانی، سەرۆكوەزیرێن هەرێما كوردستانێ، 33 کۆچبەرێن نەیاسایی ژ وەلاتێ لیبیا دێ هێنە ڤەگەراندن، ئه‌ڤه‌ ژی پشتی کو بۆ ماوێ هەشت هەیڤان ماینە د زیندانێن وی وەلاتی ڤە و رووبرووی رەوشەکا سەخت ببون.

ئەڤرۆ چارشەمبی، 02ـی ئیلونا 2026، وەزارەتا ناڤخۆ د راگەهاندنەکێدا دیارکر، پشتی گەهشتنا زانیاریان ل سەر بەرزەبوونا كومەكا وەلاتییان ل وەلاتێ لیبیا، مەسرور بارزانی، سەرۆکێ وەزیرێن هەرێما کوردستانێ هەردوو وەزارەتێن ناڤخۆ و فەرمانگەها پەیوەندیێن دەرڤە ڕاسپاردن ب لەز ڕێکارێن پێدڤی بگرنە بەر بۆ دیتن و ڕزگارکرنا وان.

وەزارەتێ ڕوونکر ژی، د نوکەدا هەموو مامەڵەیێن پەیوەندیدار ب وان 33 هەووڵاتیان ڤە ب دوماهی هاتینە و د حەفتیا بهێت دا دێ گەهنە هەرێما کوردستانێ.

د پشكەكادی یا راگەهاندنێدا حکومەتا هەرێما کوردستانێ هۆشداری دا و دووپاتی ل سەر خۆپاراستنا گەنجان و مالباتێن وان کر ژ گرتنا بەریا ڕێکا کۆچا نەیاسایی بەرەڤ وەلاتێن ڕۆژئاڤا، ئاماژە ب هندێ ژی دا، ئه‌ڤ جۆرێ کۆچێ نە بتنێ مەترسیێ ل سەر ژیانا وان دروست دکەت، بەلکو دبيتە ئەگەرا سەرپێچیکرنا یاسایێن وەلاتێن دی و لێپرسینەکا توند دێ ل دووڤ هێت.

هەروەسا بەحس ل چەندێ ژی کر، ئەو گەنجە رووبرووی رەوشەکا سەخت بووینە و بەشەک ژ وان بۆ ماوێ هەشت هەیڤان د زیندانان دا ماینە و بەردەوام د ژێر مەترسیا مڕنێ دا بووینە.