نێچیرڤان بارزانی، جێگرێ سەرۆكێ پارتی دیموكراتی كوردستان ب هەلكەڤتا 80 سالییا دامەزراندنا پارتی پەیامەك بەلاڤكر و تێدا دیاركر، پارتی دێ هەردەم دەستپێشخەر بیت بۆ دەربازكرنا ئاستەنگان و دووپاتی ل گرنگییا پێشخستنا حوكمرانییێ كر.
نێچیرڤان بارزانی، د پەیاما خۆدا پیرۆزباهییا سەرۆك بارزانی، كەسوكارێن شەهیدان، سەركردایەتی، كادر و جەماوەرێ پارتی كر و دیاركر، د 80 سالییا دامەزراندنا پارتییا واندا، پارتی دیموكراتی كوردستان، ب سەربلندیڤە بارزانییێ نەمر و هەموو وان قارەمان و شۆرشگێر و پێشمەرگەیان ل بیر دئینن كو ب باوەری و فیداكاری ژ پێخەمەت ئازادییا كوردستانێ گیانێ خۆ كریە قۆربان.
نێچیرڤان بارزانی، سەبارەت دیرووك و ئارمانجێن پارتی دیموكراتی كوردستان ئاماژە ب هندێ دا، پارتی بەری 80ێ سالان وەكو پێدڤییەكا دیرووكی ل هیڤینێ خەون و خواستێن گەلێ كوردستانێ ژ دایكبوو، داكو ڕێبەرایەتییا بزاڤا ڕزگاریخوازا كوردستانێ بكەت، ئەڤرۆ پشتی هەشت دەیەیێن پری قۆربانیدان و دەستكەڤتێن مەزن، ب هەمان گرۆتین و بەرپرسیارەتییا دیرووكی، د خەباتا بەردەوامدایە بۆ پاراستنا دەستكەڤتێن دەستووری و بدەستخستنا داهاتەكێ باشتر بۆ گەلێ كوردستانێ.
دپشكەكا دییا پەیاما خۆدا، نێچیرڤان بارزانی دووپاتی ل سەر بەرپرسیارەتییا نیشتیمانییا پارتا خۆ كر و وەكو پیشەنگ و داینەمۆیا مۆكۆمكرنا تەبایی و پێكڤەژیانێ، هەروەسا ئاماژە ب هندێ دا كو بۆ پاراستنا ئەوی كاروانی دڤێت خۆ دگەل گیانێ سەردەم و پێشكەڤتناندا نوو بكەت و دیاركر، دڤێت دامەزراویبوون و حوكمرانییێ پێشبێخن، داكو پارتی وەكو هەردەم باوەری و گەرەنتییا سەرەكییا مافێن ڕەوا یێن گەلێ كوردستانێ بیت.
