ده‌سته‌یا سه‌ربه‌خۆ یا مافێ مرۆڤى ل هه‌رێما كوردستانێ راگه‌هاند، ئه‌و ل روانگه‌یا بنه‌مایێن مافێ مرۆڤى و به‌ندێن جاڕناما مافێن مرۆڤى و د كڤانێ قانوونا به‌ركارێن هه‌رێما كوردستانێ، خوه‌نیشادانان وه‌ك مافه‌كێ ئاسایی و قانوونى یێ وه‌لاتیان دبینیت، ژ پێخه‌مه‌ت دابینكرنا داخوازیان و ئامانجه‌كا دیاری كرى د كڤانی قانوونى و رێنمایان دا و دوور ژ تووندوتیژیێ.
ده‌سته‌یا سه‌ربه‌خۆ یا مافێ مرۆڤى ل هه‌رێما كوردستانێ ئاشكرا كر، ئه‌و ژ حكومه‌تا هه‌رێما كوردستانێ دخوازن بزاڤێن خوه چڕتر بكه‌ن بۆ رێكکه‌فتنێ ل گه‌ل حكومه‌تا ناڤه‌ندى ژ پێخه‌مه‌ت دابینكرنا مووچه‌ى و شایستێن دارایی یێن مووچه‌خۆران و په‌یداكرنا ده‌لیڤێن كارى و بنبڕكرنا گه‌نده‌لیێ و دابینكرنا ژیانه‌كا ژ هه‌ژى بۆ وه‌لاتیێن هه‌رێما كوردستانێ.
ده‌سته‌یا سه‌ربه‌خۆ یا مافێ مرۆڤى داخواز ژ هه‌موو لایه‌نێن سیاسی و ده‌زگه‌هێن راگه‌هاندنێ كر ب هه‌ستیاری و هه‌ستكرن ب به‌رپرسیاتیێ سه‌رده‌ریێ ل گه‌ل ره‌وشێ بكه‌ن و هه‌موو ئالى هه‌ڤكار بن ژ پێخه‌مه‌ت دیتنا چاره‌سه‌ریا ئاریشان و گه‌هشتن ب رێكکه‌فتنێ و رێكخستنا ناڤمالیا هه‌رێما كوردستانێ و پاراستنا ئاساییشا جڤاكى و دوور ژ گۆتارا تووندره‌ویێ.
