وەزارەتا دەرڤەیا عیراقێ ڕاگه‌هاندنه‌ك به‌لاڤكر و دیاركر، ئه‌و پێشوازییێ ل وان دانوستاندنان یێن دناڤبەرا کۆمارا ئیسلامی یا ئیرانێ و ئەمریکا دا دهێنەكرن دکەت، ئەڤ چەندە ب پێنگاڤەکا ئەرێنی بۆ کێمکرنا ئالۆزییان و دەستپێکرنا قۆناغەکا نوو یا دیبلۆماسی ل دەڤەرێ ب ناڤکر.
وەزارەتێ د ڕاگه‌هاندنێدا ئاشکەراکر، ئه‌و پشته‌ڤانییا خۆ یا ته‌مام بۆ هەموو بزاڤێن ئاشتی و ئارامییێ ل دەڤەرێ دووپات دکەت، ئه‌وان باوه‌ری ب وێ چەندێ هەیە کو ب تنێ دیبلۆماسی و دانوستاندن دشێین ئاریشه‌یان چاره‌سه‌ر بكه‌ن.
وەزارەتا دەرڤەیا عیراقێ د وێ ڕاگه‌هاندنێدا سوپاسییا وه‌لاتێ عومانێ کر بۆ مێڤانیکرن و ساناهیكرنا ڤان دانوستاندنێن گرنگ یێن دناڤبه‌را ئیران و ئه‌مریكادا.
دهێته زانین، ل ڕۆژا ئەینی، 6ـێ شواتا 2026، دانوستاندن دناڤبه‌را ئەمریکا و ئیرانێ ل سەر بابه‌تێن ئەتۆمی و مووشەکی ل عومانێ هاتنه‌كرن، میدیایێن ئەمریکی دیاركرییه، کو ئەگەر هەیە ئیران بۆ دەمەکێ درێژ بەرنامێ خۆ یێ ئەتۆمی ڕابگریت، د بەرامبەردا ئەمریکا سزایێن ل سەر ئیرانێ هەلگریت.
