وەزارەتا ناڤخۆیا حکومەتا ھەرێما کوردستانێ رەزامەندی دەربڕی ل سەر ڤەکرنا فەرمانگەھا پاسپۆرتا لە سنورێ دەڤەردارییا ئامێدیێ.
بورھان سەبری سەرۆکێ ئەندازیاران ل کارگێرییا خۆجھیا پارێزگەھا دھۆک بۆ خانی نیۆز گۆت: پشتی بزاڤ و دووڤچوونەکا بەردەوام ژلایێ کارگێرییا پارێزگەھێ و پارێزگاری دھۆکێ؛ وەزارەتا ناڤخۆ رەزامەندی دا ڤەکرنا فەرمانگەھا پاسپۆرتان ل دەڤەردارییا ئامێدیێ، ئەو ژی ب بریارا وەزیرێ ناڤخۆ یا ژمارە ( ١٦١٢ ) ل ( ١٨-١-٢٠٢١ ).
بورھان سەبری گۆت ژی: کوژمێ ٣٦١ ملیۆن و ٦١٤ ھزار و ٦١٦ دینار بۆ ئاڤاکرنا فەرمانگەھێ ھاتینە تەرخانکرن و د دەمەکێ نێزیک دا دێ جھـ ژی بۆ ھێتە ئامادەکرن و دەست ب ئاڤاکرنا وێ ھێتە کرن.
ناڤبری زێدەتر گۆت: ب ڤەکرنا ئەڤێ فەرمانگەھێ دێ کارێ وەلاتیێن دەڤەرا ئامێدیێ ژبۆ ودەرکرنا پاسپورتێ ب ساناھیتر بیت و پێدڤی ناکەت ئیدی قەستا سەنتەرێ باژارێ دھۆکێ بکەن.
ئەڤەژی پشتی وێ چەندێ دھێت کو بەری نوکە چەندین جارا خەلکێ دەڤەرا ئامێدیێ داخاز ژ بەرپرسێن دەڤەرێ کربوو ب مەرەما سڤککرنا کارێن وان و دویر نەکەفتن ژ سنورێ ئامێدیێ فەرمانگەھا پاسپۆرتان بۆ وان بھێتە ڤەکرن.
خانی نیوز، ھەیوار ستار
