وەلاتێ ئیماراتێ ئێکە ژ وان وەلاتان” كو هەتا نوكە چەندین پڕۆژە ل ھەرێما کوردستان ئەنجام داینە و گرنگییەکا تایبەت ب ھەرێما کوردستانێ ددەت، نوكە پتری ١٠ پڕۆژان ل ھەرێما کوردستانێ ھەنە.
د. محەمەد شوکری، سەرۆکێ دەستەیا وەبەرھێنانێ ل ھەرێما کوردستانێ دیاركر: پەیوەندییێن مە ل گەل کۆمپانیێن ئیماراتی گەلەك د باشن و هژمارەكا کۆمپانیێن ئیماراتی ل ھەرێما کوردستانێ ھەنە، د چەندین واران دا کار دکەن و گرنگییەكا زۆر ب ھەرێما کوردستانێ ددەن، ئەوێن نوكە هەین ژی د وارێ چاندنێ دا کاردکەن و پڕۆژەكێ مەزن ل زاخۆ بۆ ھنارتنا بەرھەمێ ناڤخۆیی یێ ھەرێما کوردستانێ بۆ دەرڤە هەیە و ل داھاتی دا دێ هێتە بجهئینان و سەرمایێ وان پرۆژان ل هەرێما كوردستانێ دگەهیتە سەدان ملیۆن دۆلاران.
ناڤهاتی گۆت ژی: كۆمپانیێن ئیماراتی د كەرتێ نەفت و غازێ ژی دا کاردکەن، هەروەسا ل كەرتێ چاندنێ و پیشەسازی و گەشتوگوزاری ژی کارێ وەبەرھێنانێ و کارێ ڤەگوهاستنێ دکەن، ئەم بەردەوام د پەیوەندییان داینە بۆ هندێ پتر کۆمپانیێن ئیماراتی بۆ ھەرێما کوردستانێ ڕابکێشین و کارێن باشتر بکەین، هندی وێڤەتر دچیت” پەیوەندیێن مە ل گەل ئیماراتێ د بیاڤێ وەبەرھێنانێ دا باشتر لێ دهێن و کارێن مە ژی پتر پێشڤە دچن، ئیمارات ئێکە ژ وان وەلاتان كو زۆرترین کارێ وەبەرھێنانێ ل ھەرێما کوردستانێ ئەنجام ددات” ل سەر ڕاسپاردا سەرۆکێ حکوومەتێ پێدڤییە ئاسانکاریێن تەمام بۆ وەبەرھێنەرێن ئیماراتی بهێنە كرن بۆ ئەوان پڕۆژێن وان دڤێت ل ھەرێما کوردستانێ ئەنجام بدەن.
