بزانە ل دەمێ تووشی ئەنفلوەنزایێ دبی كیژ خوارن باشن بهێنە خوارن و كیژ نە دباشن

خوارنا ژەمێن ساخلەم ژ ڕێكێن سەرەكی یە یێن كو چارەسەرییا نەخۆشییا ئەنفلوەنزایێ بلەز دئێخیت، و مرۆڤی ژ كارتێكرنێن وێ یێن لاوەكی دپارێزیت. لێ یا پێدڤییە ئەوان خوارنان ب هەلبژێرین یێن بەرگرییا لەشی بهێزدئێخن و خۆ دویربكەین ژ وان خوارنان یێن زیانێ ب ساخلەمییا لەشی دگەهینن.
هندەك خوارن هەنە نابیت ل دەمێ ئەنفلوەنزایێ بخۆین ژبەركو كریارا چارەسەربوونێ لاواز دكەن و پێدڤییە خۆ ژێ دویربێخین، ژوان:
1- خوارنێن دەستكرد: وه‌كی گۆشتێ قۆدیكان و خوارنێن دی یێن قۆدیككری ژبەركو پێكدهێن ژ دوهنێن زیانبەخش و سیستەمێ بەرگرییا لەشی لاواز دكەن.
2- شریناهی: ژبەركو خوارنێن دەولەمەند ب شەكرێ ل دەمێ ئەنفلوەنزایێ هەودانان زێدەدكەن.
3- خوارنێن دۆهنی: كریارا هەرسكرنێ لاوازدكەن.
4- سپیاتی: ژبەركو ژ لاكتۆزی پێكدهێن و هەرسكرنا وێ یا ب زەحمەتە و دبنە ئەگەرێ عێلنجی و دلڕابوونێ.
5- كافایین: پێدڤییە خۆ دویربێخین ژ ڤەخوارنێن دەولەمەند ب كافایینی وەكو چا و قەهوە، ژبەركو هشكاتییا لەشی زێدەدكەن.

ئەو خوارنێن كو دباشن ل دەمێ ئەنفلوەنزایێ بهێنە خوارن:
1- شۆڕبە: شۆڕبێن گەرم یێن مریشكێ و گوشتی و زەڕزەواتێن كەرەفس و گێزەرێ، ژ باشترین خوارنانە كو هاریكارن بۆ چارەسەركرنا ئەنفلوەنزایێ، ژبەركو گەورییێ ئارام دكەن و هەودانان كێمدكەن و ڕێگرییێ ل توشبوونێ ب هشكبوونا لەشی دكەن.

2- سیر: ژبەركو نیشانێن ئەنفلەونزایێ كێم دكەت و بەرگرییا لەشی بهێزدئێخیت و ب دژی نەخۆشییانە، ب تایبەت نەخۆشییێن سیستەمێ هەناسەدانێ.
3- ترشاتی: ژ باشترین خوارنان ل دەمێ توشبوونێ ب ئەنفلوەنزایێ ترشاتی نە، وەكو پرتەقال، لەیمون، كیڤی و فڕاولە ژبەركو سیستەمێ بەرگرییێ بهێز دئێخن.
4- كەسكاتییێن ب بەلگ: ڕۆلەكێ باش د باشتركرنا ساخلەمییا سیستەمێ بەرگرییێ دا هەیە ژبەركو پێكدهێت ژ ئاسنی و ترشێ فۆلیك. سپیناغ و بڕوكلی ژ گرنگترین كەسكاتییێن ب بەلگن كو باشە ل دەمێ توشبوونێ ب ئەنلوەنزایێ بهێنە خوارن.
5- زەجەبیل: هاریكارە بۆ چارەسەركرنا دلڕابوونێ كو دگەل ئەنفلوەنزایێ دروست دبیت و هاریكارییا سیستەمێ هەرسكرنێ دكەت بۆ هەرسكرنا خوارنێ.
6- ئاڤ و ڤەخوارنێن دی: پێدڤییە پاراستن ل سەر شەهدارییا لەشی بهێتەكرن ب ڤەخوارنا ڕێژەیێن باش ژ ئاڤێ كو هاریكارییا گولچیسكان دكەن ژەهران ژناڤ لەشی دەربێخن. ئاڤا گیزا هندێ ژی دەولەمەندە ب پۆتاسیۆم، سۆدیۆم و كلۆراید كو دگرنگن بۆ بالانسكرنا خوێ و كانزایان دلەشی دا. هەروەسا ڤەخوارنا زەنجەبیلێ ل گەل هنگڤین و لەیمونێ.

ژێدەر: ويب طب.