ژ ئه‌گه‌رێ به‌لاڤبوونا ڤایرۆسێ نوو یێ كۆرۆنایێ ل وان وه‌لاتان، لژنا بلندا ساخله‌مییا نشتیمانى یا ئیراقێ قه‌ده‌غه‌یا گه‌شتكرنێ بۆ هژماره‌كا وه‌لاتان درێژكر.
شه‌ڤا بوورى، لژنا بلند یا ساخله‌مییا نشتیمانى یا ئیراقێ یا تایبه‌ت ب به‌رهنگارییا ڤایرۆسێ كۆرۆنایێ ب سه‌رۆكاتییا مسته‌فا كازمى كۆم بوو و ژ ئه‌گه‌رێ سه‌رهلدانا جۆرێ نوى یێ ڤایرۆسێ كۆرۆنایێ بریارا قه‌ده‌غه‌یا گه‌شتكرنێ ژ ئیراقێ بۆ 20 وه‌لاتان هاته درێژكرن.
د هه‌مان ده‌م دا، بریار هاته‌دان هاتنا گه‌شتییاران ژ وان وه‌لاتان ژى بۆ ئیراقێ بهێته قه‌ده‌غه‌كرن و بتنێ رێ ب گه‌شتیارێن ئیراقى دهێته‌دان ڤه‌گه‌رنه وه‌لاتى ب وى مه‌رجى 14 رۆژان بهێنه كه‌ره‌نتین كرن.
ئه‌و وه‌لاتێن ئیراقێ بریارا قه‌ده‌غا هاتنوچوونێ داى هه‌ر ئێك ژ بریتانیا، نه‌مسا، به‌رازیل، به‌لجیكا، هندستان، فره‌نسا، یۆنان، گۆرجستان، ژاپۆن، باشوورێ ئه‌فریقیا، سلۆڤاكیا، لۆكسمبۆرگ، ئه‌لمانیا، ئێرله‌ندا، ئسپانیا، زامبیا، ئه‌مریكا، دانیمارك، فنله‌ندا و ئوستورالیا نه.
پێشتر ئیران و هۆله‌ندا ژى د ناڤا لیستا وه‌لاتێن قه‌ده‌غه‌كرى دا بوون لێ ل داویا كۆمبوونا لژنا ساخله‌مییا ئیراقێ ناڤێ وان ژ لیستێ هاته ده‌رێخستن، ئه‌و بریار ژى دبلوماتكار و شاندێن فه‌رمى یێن حكومه‌ت و رێكخستنێن ناڤده‌وله‌تى ب خۆه‌ڤه‌ناگریت، لێ دڤێت بۆ ده‌مێ 72 ده‌مژمێران پێش گه‌هشتنا وان بۆ ئیراقێ پشكنین بۆ بهێنه‌كرن.
