وه‌زاره‌تا بازرگانییێن عیراقێ و هه‌رێما كوردستانێ روونكرنه‌ك ده‌رباره‌ى وه‌رگرتنا گه‌نمێ ئه‌ڤ ساله و پاره‌یێ جۆتیاران دا و به‌رپرسه‌ك دبێژیت، جۆتیار ل هه‌مان رۆژێن گه‌نمێ خوه راده‌ست دكه‌ن دێ پاره‌یێ خوه وه‌رگرن.
محه‌مه‌د حه‌نوون په‌یڤدارێ وه‌زاره‌تا بازرگانییا عیراقێ بۆ ئاژانسا نووچه‌یێن عیراقێ راگه‌هاند، وه‌رزێ بازاركرنێ ب به‌رهه‌مێ گه‌نمى بۆ سالا 2023ێ سه‌ركه‌ڤتنه‌كا مه‌زن د پێدانا پاره‌یى و شایسته‌یێن جۆتیاراندا بده‌ستخستییه.
ئاماژه ب هندێ ژى دا، سه‌رۆكێ جڤاتا وه‌زیران ب دوو قستان بریارا خه‌رجكرنا شایسته‌یێن دارایى یێن جۆتیاران ده‌ركر، كوژمه ژى گه‌هشته ئێك ترلیۆن دیناران، نوكه د پرۆسه‌یا وه‌رگرتنا قستێ سێیێ یێ وى پاره‌یداینه.
دیار ژى كر، هیڤییا وان ئه‌وه ئه‌ڤ وه‌رزه ئێك ژ مه‌زنترین وه‌رزێن بازاركرنا به‌رهه‌مێ گه‌نمى و پێدانا مافێن جۆتیاران بیت.
وه‌زاره‌تا بازرگانی ئاشكراكر، رێژه‌یا بازاركرنا ده‌خلودانێ گه‌نمى ژ 750 هزار ته‌نان بوورییه و هه‌ر ئێك ته‌ن ژى ب 850 هزار دینارایه.
ل دووڤ زانیارییان پێنگاڤێن وه‌زاره‌تا بازرگانییا هه‌رێما كوردستانێ بۆ وه‌رگرتنا گه‌نمێ ئه‌ڤ ساله یێ جۆتیاران ده‌ستپێكرینه و لژنه‌یه‌كا بلند كۆمبوونا خوه كرییه و ئه‌ڤ ساله دێ ل ئێكى خزیرانێ ده‌ست ب وه‌رگرتنا گه‌نمێ جۆتیاران هێته‌كرن.
