پشتیوان سادق وه‌زیرێ ئه‌وقاف و كاروبارێن ئایینى راگه‌هاند، كولتوور و پێكڤه‌ژیانا ئایینى و نه‌ته‌وه‌یى ل كوردستانێ رهـ و ریشالێن كوور هه‌نه، كو بۆ ب سه‌دان سالان به‌رى نوكه ڤه‌دگه‌ریت، ئه‌و شیان كوردستانێ ژلایێ جڤاكى و سیاسى و خه‌بات و شۆره‌شگێرییێڤه و نوكه ژى ژلایێ په‌رله‌مان و حوكمرانییێڤه بگه‌هیننه ئه‌ڤرۆ.
پشتیوان سادق د پرێسكۆنفرانسه‌كێ هه‌ڤپشكدا دگه‌ل ئایدن مه‌عروف وه‌زیرێ هه‌رێمێ بۆ كاروبارێن پێكهاته‌یان و ئومێد خۆشناو پارێزگارێ هه‌ولێرێ به‌حس ل هندێ كر، هه‌موو پێكهاته‌یان شه‌هید داینه، خه‌بات كرییه و كوردستان مولكێ ئایین و نه‌ته‌وه‌یه‌كى ب تنێ نینه، به‌لكو مولكێ هه‌موویان پێكڤه‌یه.
ئاماژه ب هندێ ژى دا، ئێك ژ خالێن هه‌ڤپشكێن كوردستانێ ژ ده‌رڤه، ئه‌و پێكڤه‌ژیانه‌یه یا ل ڤێرێ هه‌ى و گوت: ئه‌ڤرۆ زێده‌تر ژ ئێك ملیۆن خووشك و برایێن عه‌ره‌ب ل هه‌رێما كوردستانێ دژین، ئه‌ڤه نیشانا كولتوورێ جوانێ خه‌لكێ كوردستانێ یه.
پشتیوان سادقى دیار ژى كر، به‌هرا پتر یا مه‌سیحى و ئێزدییێن عیراقێ نوكه ل هه‌رێما كوردستانێ دژین، ئه‌ڤه‌ژى ده‌رئه‌نجامێ دل فره‌هى و پێكڤه‌ژیانا پێكهاته‌یێن هه‌رێما كوردستانێ یه.
وه‌زیرێ ئه‌وقافێ ئاشكرا ژى كر، گوتارێن مامۆستایێن ئایینى ب تایبه‌تى یێن ئایینێ ئیسلامێ جهێ رێز و پێزانینێ نه و دووپاتى ل هندێ كر، وه‌زاره‌تا ئه‌وقافێ دێ د خزمه‌تا هه‌موو مامۆستایێن ئایینى و پێكهاته‌یێن دیدا بیت.
