سه‌رۆكێ كۆمیسیۆنا هه‌لبژارتنێن عیراقێ ده‌ست ژ كاركێشانا خوه‌ پێشكێشكر

هه‌یمان ته‌حسین رێڤه‌به‌رێ گشتییێ پارتان ل كۆمیسیۆنا هه‌لبژارتنێن عیراقێ راگه‌هاند، جه‌لیل عه‌دنان سه‌رۆكێ كۆمیسیۆنا هه‌لبژارتنێن عیراقێ ده‌ست ژ كاركێشانا خوه‌ پێشكێشكر.

د. هه‌یمان ته‌حسین رێڤه‌به‌رێ گشتییێ پارت و رێكخستنێن سیاسى ل كۆمیسیۆنا بلندا سه‌ربه‌خۆ یا هه‌لبژارتنێن عیراقێ دیاركر، دادوه‌ر جه‌لیل عه‌دنان خه‌له‌ف سه‌رۆكێ كۆمیسیۆنا بلندا سه‌ربه‌خۆ یا هه‌لبژارتنێن عیراقێ ده‌ست ژ كاركێشانا خوه‌ پێشكێشى فایه‌ق زێدان سه‌رۆكێ جڤاتا بلندا دادوه‌رییا عیراقێ كر.

وه‌كو ئه‌و به‌رپرسێ كۆمیسیۆنێ دبێژیت، پێشتر سه‌رۆك و ئه‌ندامێن جڤاتا بلندا كۆمیسیاران ژلایێ سه‌رۆكێ جڤاتا بلندا دادوه‌رییێ ڤه‌ هاتبوونه‌ دیاركرن، له‌وما سه‌رۆكێ كۆمیسیۆنێ ده‌ست ژ كاركێشانا خوه‌ پێشكێشى سه‌رۆكێ جڤاتا بلندا دادوه‌رییا عیراقێ كر.

ئێك ژ داخوازێن سه‌ره‌كییێن چارچووڤێ هه‌ماهه‌نگییا شیعان گوهۆرینا سه‌رۆكێ كۆمیسیۆنا بلندا سه‌ربه‌خۆ یا هه‌لبژارتنان بوو، ئه‌وان سه‌رۆكێ كۆمیسیۆنێ ب كه‌سه‌كێ نێزیكى ره‌وتا سه‌درى تومه‌تبار دكر.

هه‌روه‌سا عه‌لى فه‌یسه‌ل ده‌حام سكرتێرێ گشتییێ جڤاتا كۆمیسیاران دراگه‌هاندنه‌كێدا دبێژیت: دادوه‌ر جه‌لیل عه‌دنان خه‌له‌ف سه‌رۆكێ كۆمیسیۆنا بلندا سه‌ربه‌خۆ یا هه‌لبژارتنان ده‌ست ژ كاركێشا.