بۆ گوتوبێژکرنێ ل سەر چەند پێشنیازە یاسایێن تایبەت ب سەندیکا کەرتێ ساخلەمییێ و ئاریشە و ئاستەنگێن کەرتێ ساخلەمییێ ب گشتی، لژنەیا کاروبارێن ساخلەمییێو ژینگەهێ و مافێ ب کاربەری ل پەرلەمانێ کوردستانێ بڕیار دا د دەمەکێ نێزیکدا وەزیرێ ساخلەمییێ داخواز بکەت ژ بۆ هندێ ل ڕوونشتنا لژنەیان ئامدەببیت.
ئەڤرۆ سێشەمبی 7 ئادارا 2023، لژنەیا کاروبارێن ساخلەمییێ و ژینگەهـ و مافێن بەکاربەری، ب مەرەما گوتوبێژکرن ل سەر چەند پرسێن پەیوەندیدار ب کاروبارێن لژنێ ڤە، ب سەرپەرشتییا سەباح زێباری سەرۆکێ لژنێ و ب ئامادەبوونا بڕیاردەر و ئەندامان و شیرەتکارێن لژنێ کۆمبوونا خۆ یا ئاسایی ئەنجامدا.
د کۆمبوونێ دا گوتوبێژ ل سەر چەند پێشنیازە یاسایێن تایبەت ب سەندیکا کەرتێ ساخلەمییێ و ئاریشە و ئاستەنگێن کەرتێ ساخلەمییێ ب گشتی هاتە کرن، بۆ ئەڤێ مەرەمێ ژی لژنەیێ بڕیاردا د دەمەکێ نێزیکدا وەزیرێ ساخلەمییێ بۆ پەرلەمانی داخواز بکەت ژ بۆ کو د ڕوونشتنا لژنەیا ساخلەمییێ دا ئامادە ببیت.
د کۆمبوونێدا چەند پرسێن تایبەت ب دیڤچوون و ئاریشەیێن کەرتێ ساخلەمییی ب تایبەتی دوماهی سەرەدانا لژنێ بۆ کوالێتییا کۆنترۆلی یا دەرمانان هاتنە بەرچاڤکرن.
