ئەڤرۆ رێکەڤتی 1 ئادارا 2023 ل سەنتەرێ کۆنفرانسان ل زانکۆیا دهۆک، ب ئامادەبوونا نوونەرێن وەزارەتا خواندنێن بلند و ڤەکۆلینێن زانستی و وەزارەتا پەروەردێ و نوینەرێن ئێکەتیا ئۆروپی و زانکۆیێن ئۆروپی و کوردستانی و هژمارەکا مامۆستا و قوتابیان، پرۆژێ “مۆدێرنکرنا مامۆستایێن پاشەرۆژی یێن قوتابخانێن بنەرەت ل کوردستانێ” ب رێورەسمەکێ شایستە دەستپێکر.
پرۆژێ ناڤبری ژ لایێ ئێکەتیا ئۆروپی هاتیە پشتەڤانیکرن و ب هەڤکاری دگەل چوار زانکۆیێن ئۆروپی و هەروەسا چوار زانکۆیێن کوردستانی، دێ د ماوێ دوو سالان دا هێتە بجهئینان. ئەڤ پرۆژە ل سەر گەلەک ئاستان دێ کار بۆ بلندکرنا کوالتیا خواندنێ و ئاستێ دەرچوویێن کولیژێن پەروەردا بنیات کەت، وەکو، پێشڤەبرنا پرۆگرامێن خواندنێ ل ڤان کولیژان و راهێنانا مامۆستایان ل سەر بنەمایێ نویترین تەکنیکێن پێداگۆجیێ.
