وه‌زیری داد یێ عیراقێ، پێکئینانا لژنا بلند یا بجهئینانا ماددێ 140 یێ دەستوورێ عیراقێ راگەهاند، کو ل سالا 2014 وەرە کارێن وێ لژنێ هاتینە ڕاگرتن.
ئه‌ڤرۆ دووشه‌مبی 28 تشرینا دووێ یا 2022، خالد شوانی، وه‌زیرێ داد یێ عیراقێ د کۆنفڕانسەکێ ڕۆژنامەڤانیدا، پێکئینانا لژنا بلند یا ماددێ 140 راگەهاند، کو د کارناما پەسەندکری یا کابینا سوودانی دا دەمێ مەهەکێ بۆ دیارکربوو.
وەزیرێ داد یێ عیراقێ ئاماژەکریە، نەبوونا وێ لژنەیێ، ئەگەرێ دروستبوونا بوشاییەکا مەزنبوو بۆ سەر ژ نوی تەعریبکرنا کەرکووک و دەڤەرێن ڤەقەتیای یێن دی، ب پێکئینانا وێ لژنەیێ جارەکا دی دێ ماددێ 140 کەڤیتە سەر رێکا کارێن خۆ.
دەربارەی دەستبکاربوونا لژنا بلند یا بجهئینانا ماددێ 140 یێ دەستووری، وەزیرێ داد یێ عیراقێ ڕۆهنکر، د دەمێ 10 ڕۆژان دا ئەو لژنەیە دێ دەستبکاربیت و دێ بودجا خۆ یا خەملاندی پێشکێشی جڤاتا وەزیرێن عیراقێ کەت، ژ بۆ هندێ د بودجا گشتی یا سالا 2023 یا فیدڕالی دا پارەیێ پێدڤی بۆ بهێتە مەزاختن.
