بازاره‌كێ مودێرن بۆ كرین و فرۆتنا چه‌كى لژێر چاڤدێرییا وه‌زاره‌تا نافخۆ دێ هێته‌ درووستكرن

پشتى چه‌ند هه‌یڤان ژ داخستنا بازارێن فرۆتنا چه‌كى ل هه‌رێما كوردستانێ، وه‌زاره‌تا نافخۆ ل دووڤ چه‌ند رێنمایێن تایبه‌ت بریاردا بازاره‌كێ مودێرن بۆ كرین، فرۆتن و چاككرنا چه‌كى ل هه‌رێما كوردستانێ ب هه‌ڤپشكی دناڤبه‌را كه‌رتێ گشتى و كه‌رتێ تایبه‌تدا درووستبكه‌ت.

ل دووڤ رێنمایێن تایبه‌ت ب پێدانا موله‌تا هه‌لگرتن و كرین و فرۆتنا چه‌كى ل وه‌زاره‌تا نافخۆ یا حكومه‌تا هه‌رێما كوردستانێ، ئاماژه‌ ب هندێ هاتییه‌ كرن بازاره‌كێ هه‌ڤچه‌رخ بۆ كرین و فرۆتنا چه‌كى ل هه‌رێما كوردستانێ دێ هێته‌ درووستكرن، كو هه‌موو ئه‌و كه‌سێن مامه‌لێ ب چه‌كى دكه‌ن دێ ل داتابه‌یسه‌كێ تایبه‌ت زانیارییێن خوه‌ تۆماركه‌ن.

بۆ ئه‌ڤێ مه‌ره‌مێ وه‌زاره‌تا نافخۆ ب هه‌ماهه‌نگى دگه‌ل وه‌زاره‌تا باژێرڤانییێ كار لسه‌ر دابینكرنا زه‌ڤییه‌كێ بۆ درووستكرنا بازارى دكه‌ت كو دێ ب هه‌ڤپشكى دناڤبه‌را كه‌رتێ تایبه‌ت و كه‌رتێ گشتیدا لژێر چاڤدێرییا وه‌زاره‌تا نافخۆ هێته‌دانان.