وەلاتێ رووسیا بزاڤان دكەت ب رێیا ئەنجامدانا گشتپرسییەكێ، 15% یا ئاخا ئوكرانیا ب رووسیا ڤە گرێدەت.
بریارە ئەڤرۆ ل چار دەڤەرێن ئوكرانیا كۆ ژلایێ رووسیا و هێزێن جوداخواز یێن ئوكرانیا ڤە دەست ب سەردا هاتییە گرتن گشتپرسی بهێتەكرن ژبۆ وێ یەكێ ئەو دەڤەرە ببنە پشكەك ژ ئاخا رووسیا. ئەڤ چەندە ژی ژلایێ وەلاتێن رۆژئاڤا ڤە دهێتە شەرمزاركرن و ب گشتپرسییەكا ” نەشەرعی ” دهێتە ب ناڤكرن.
ئەو بەرپرسێن پشتی دەست ب سەرداگرتنا دەڤەرێن ئوكرانی ژلایێ رووسیا ڤە هاتینەدانان رۆژا سێشەمبی پلانا ئەنجامدانا وێ گشتپرسییێ راگەهاند. لێ ئوكرانیا و هەڤپەیمانێن وێ دبێژن، ئەنجامێن وێ چ بن ئەم رەت دكەین و دانپێدانێ پێ ناكەین.
ل دەڤەرێن لۆهانسك، دۆنتێسك، خێرسون و زاپۆریژیا كۆ هندەك ژ وان ب تەمامی و هندەكێن دی ژی پشكەك ژوان ل بن دەستێن رووسیا و هێزێن جوداخواز یێن ئوكرانیا دانە كۆ 15% یا ئاخا ئوكرانیا پێك دئینن، گشتپرسی دێ هێتەكرن و بریارە ئەو پرۆسە هەتا رۆژا سێشەمبی یا بەردەوام بیت.
ل سالا 2014ێ ژی رووسیا گشتپرسییەك ل نیمچە دورگەها كریمیا كر دا بكەتە پشكەك ژ ئاخا رووسیا، ل دویڤ ئەنجامێن رووسیا 97% یا خەلكێ وێ دەنگ ب چوونا دگەل رووسیا دا. هەرچەندە ئەو ئەنجامە ژلایێ ئوكرانیا و كۆمەلگەها ناڤدەولەتی ڤە ب ” سەختە ” هاتە دیاركرن و دانپێدان پێ نەهاتەكرن، لێ ژ وی دەمی هەتا نوكە ئەو دەڤەرە ل بن دەستێ رووسیا و هێزێن جوداخواز یێن ئوكرانیا دایە.
