د راپۆرته‌كا رۆژنامه‌ڤانیدا، رۆژناما نیویۆرك تایمز یا ئه‌مریكی، په‌رده ل سه‌ر راستی و مه‌ترسییێن ره‌وشا نوكه یا عێراقێ راكرییه و راگه‌هاندییه، “عێراق یا به‌ره‌ف دابه‌شبوونێ دچیت و سیسته‌مێ سیاسی و حكومڕانییێ ئیفلیج بوویه”.
هه‌روه‌سا گۆتییه، “سیسته‌مێ سیاسی ل عێراقێ ب دووماهی هاتییه و ئه‌و وه‌ڵاته تووشی ئیفلیجا سیاسی و ئه‌منی بوویه، هه‌روه‌سا ده‌ستهه‌لاتا دادوه‌ری و دادگه‌هان ل عێراقێ د سه‌ربه‌خۆ نینن و نه‌هاتینه كۆنتڕۆل كرن”
ئه‌و ژی ئاشكرا كرییه، ” نوكه عێراق بوویه دو به‌ره‌یێن سه‌ره‌كی، ئێك ل گه‌ل ئیرانێ یه و ئێك ژی ل دژی ئیرانێ، ئه‌ڤه ژی یا مه‌ترسیداره و ئه‌ڤه دێ عێراقێ به‌ره‌ف كاڤلكارییێ و شه‌رێ ناڤخۆیی ڤه به‌ت”.
وێ رۆژناما ئه‌مریكی ئاشكرا كرییه ژی،”دوباره‌كرنا هه‌لبژارتنان و راستڤه‌کرنا دەستووری و گۆهۆرینا یاسایا هەڵبژارتنان، چاره‌سه‌ری نینه، به‌ڵكو به‌رۆڤاژی دێ بیته ئه‌گه‌رێ ده‌ستپێكرنا شه‌رێ ناڤخۆیی و دێ بیته ئه‌مرێ واقع”.
ئه‌و ژی گۆتییه، “كوردێن هه‌رێما كوردستانێ و عه‌ره‌بێن سوننی، ژ ڤێ ره‌وشا نوكه د ترسن و پرانییا وان ل گه‌ل دابه‌شكرنا عێراقێنه ب سه‌ر سێ پێكهاتێن سه‌ره‌كی (كورد و شیعه و سوننی) دا، ئه‌ڤه تاكه چاره‌سه‌رییه، چونكی سیاسه‌تا ئه‌مریكا ژ 2003 ێ هه‌تا نوكه، شكه‌ستن ئینایه د دروستكرنا عێراقه‌كا ئێكگرتی و دیموكراسی دا، له‌وما نوكه تاكه چاره‌سه‌ری دابه‌شبوونا عێراقێیه.
