ب بزاڤێن فراكسیۆنا پارتى نێزیكى سێ هزار كه‌سان دێ هێنه‌ دامه‌زراندن

جێگرێ رێڤه‌به‌رێ ساخله‌مییا نه‌ینه‌وا ئاشكراكر، وه‌زیرێ ساخله‌مییا عیراقێ ره‌زامه‌ندى ل سه‌ر دامه‌زراندنا دوو هزار و 800 ده‌رچوویێن به‌شێن ساخله‌مییا سنۆرێ نه‌ینه‌وا دا و گوت: په‌رله‌مانتارێن فراكسیۆنا پارتى ل به‌غدا رۆل د دامه‌زراندنا خه‌لكێ سنۆرێ مادێ 140 دا هه‌بوو.

جێگرێ ساخله‌مییا نه‌ینه‌وا ئه‌حمه‌د دوبه‌ردانى بۆ ئاژانسا خانى دیاركر، پشتى بزاڤێن وان و په‌رله‌مانتارێن فراكسیۆنا پارتى ل په‌رله‌مانێ عیراقێ، شیان ناڤێن دوو هزار و 800 ده‌رچوویێن به‌شێن ساخله‌مییا سنۆرێ مادێ 140 ل پارێزگه‌ها نه‌ینه‌وا بۆ حكومه‌تا عیراقێ ب فرێبكه‌ن و پشتى ده‌مه‌كى فورمێن دامه‌زراندنێ بۆ وان ده‌رچوویان هاتنه‌ پركرن.

جێگرێ رێڤه‌به‌رییا ساخله‌مییا نه‌ینه‌وا گوت ژى، لیستا ناڤێن ده‌رچوویان ره‌وانه‌ى وه‌زاره‌تا ساخله‌مییا عیراقێ هاتییه‌ كرن و پرۆسه‌یا چاكسازییێ دوێ لیستێ دا ده‌ستپێكرییه‌، ژبه‌ركو پێداچوون دێ بۆ سالێن ده‌رچوونا هه‌موو ناڤان هێته‌كرن.

ئه‌حمه‌د دوبه‌ردانى ئاماژه‌ ب هندێ ژى دا، وه‌زیرێ ساخله‌مییێ لیستا ناڤان په‌سه‌ندكرییه‌ و ب تنێ مایه‌ كو پرۆسه‌یا هووربینییێ د لیستێ دا ب دووماهى بهێت، ئه‌گه‌ر ئاریشه‌ د چ ناڤان دا نه‌بن، هه‌موو دێ ل سه‌ر میلاكێ وه‌زاره‌تا ساخله‌مییا عیراقێ هێنه‌ دامه‌زراندن، و فراكسیۆنا پارتى رۆلێ سه‌ره‌كى د وان دامه‌زراندنان دا هه‌یه‌.